الشعر ناداني وجيته ملبي=ماهو بكيفي جيت مغصوب بالحيل
كل القوافي حلفتني بربي=اني اجي مليان وحروفي السيل
وانا مثل ذيك العواصف معبي=وديان شعري ماتعرف التساهيل
علمتها كيف الذليل متغبي=وعلمتها ساعات نزفي من القيل
قالت صغيره.. شوف هذي لعبي!!=قلت إكبري لجل الرجال الحلاحيل
أللي لهم بالطيب دارن تربي=واللي لهم بالعز بيت ومعاميل
من شان ربعي يالمباهير صبي= أهل المشاعل لابتي والمشاكيل
قومٍ لهم كل علةٍ تستطبي=رايات عز وتلتهب هجعة الليل
لوتسأل التاريخ جاك التنبي=يعطيك صافي مجدنا والمحاصيل
رح فتش المكشوف و المستخبي= تلقى لنا الماضي بعز المقابيل
سادات ..ماقلنا يالايام هبي=حنا الهبوب اللي تقص المفاصيل
حنا الكرم ببيوتنا مستتبي=وحنا العطايا واليدين الهماليل
شراية الضلّع يالايام تبي=تاريخنا يشهد بكل التفاصيل
قلته وانا حالف وصادق بربي=اني اقول الحق وابعد عن الميل
لاماخفضت جناح مدحي لسبي=الحر حر.. ولايعرف التهاويل
شاعر وهاجوس القوافي لعبي=قاصود والميدان مايوفي الكيل
ابراهيم الحسَّان