الوضع مآساوي
 

تزين .. ولاّ تشين .. الامر متساوي
انا كذا صار حالي // لا تلوموني

احبها ( حب ) لايرحم .. ولاياوي
حب ٍ يخلي ثقيل القوم مجنوني

ياشيخة الغيد انا عبدالله الهاوي
انتي هواي وحياتي طعمي ولوني

عيدي علي الحياة الوضع مآساوي
وهموم قلبي كثير وزادت طعوني

اشتقت لصوتٍ يبل الروح ويداوي
اليا سمعته جروح الصدر ينسوني

واشتقت اعانق معاك الغيم واخاوي
روح الطهر فيك وانا فيك مفتوني

واشتقت لـ الليل يومه فيك متضاوي
في نور وجهك وانا بالنور يلقوني

واشتقت اقص القصص واصير لك راوي
واليا نعستي منامك داخل عيوني

واشتقت اردد صباح المسك والجاوي
ياللي ماغيرك من الخفرات يغروني

واشتقت واشتقت لكني على الخاوي
لارّحم ابو الشوق زلزل ثابت ركوني

ذيب الغلا … يابعد حيي لكم عاوي
يقنب قصايد على طرياك يبكوني

و انا انتمائي لو انه صار حفراوي
روحي بـ وادي حبيبي لا تعذلوني

تزين .. ولا تشين .. الأمر متساوي
مع القصايد .. وحر الشوق خلوني