طاب الكلام وطاب تسطير الاشعار = هيضت لي شعر(ن)له اسنين مهجور
اليا بغيت الشعر ماني بمحتار = فتحت لي باب(ن) عن البعض محظور
بحرالشعر لي فيه مدخل ومظهار =ادخل بحر والعب على عدة ابحور
اختار بحر (ن)فيه لؤلؤ ومحار = واغوص غبات البحر وانزل احدور
واليا ظهرت ارقا على ضلع سنجار =ابني من احجار الجبل وازرع ازهور
واتعب على التاسيس من خوف ينهار =ابني حجر ماهو زجاج (ن) وديكور
اخاف من كلمة هل العرف والكار=وش موقفي لاقالوا البيت مكسور
الشعر عندي له مفاتيح واسرار =واليا حضر راعيه ماني بمعذور
لو انتعذر ما يفيدن الاعذار = ومهما مدحنا يلحق الشاعر اقصور
في حفل شمر جمع وافين الاشبار= شرفتنا ياشيخ الاسلم ومشكور
ياشيخ برغش اسمع الكلمه اجهار = بقولها وشهودها عندي احضور
زيارتك تاج(ن)على روسنا اشعار =تبقى وسام(ن)حاملينه على اصدور
برغش علم والله يجيرك عن النار =شيخ(ن) ولد شيخ(ن) الى نفخة الصور
نسمع ببرغش قبل تاراك الانظار =حر(ن)تعلا واعتلا نابي القور
سلام ياحر(ن) على كف صقار =واليا ارتفع مضراب كفه على الزور
حر(ن)تسلسل من حرار(ن)على وكار=يوم انها بالسيف والسرج والكور
لعل عود(ن)خلفك وسط الانهار = في جنة الفردوس وامعاشر الحور
ابوك لو نشرح عنه بعض الاخبار =حبر القلم ينشف ولا كمل الدور
وجدك ليا اشتد الوغا والدخن ثار =ياما نصر طابور واسرف بطابور
ياما صفقهم ونتحوا عنه عبار= ضاري بكف وكف ناصر ومنصور
مايمحي التاريخ لو هبت اعصار = يبقى فعل ضاري على الصخر محفور
وبرغش ذرا المضيوم والضيف والجار =من لاذ به كنه بعالي جبل طور
اليا ظهر بالجو دخان واغبار = واليا تردن صار برغش لهن سور
واليا حضرعدوان بالموقف الحار =يصحى غرور اللي من الكبر مغرور
بالسلم شيخ وساعة الحرب مغوار =سيفه يداوي باللقا كل ممرور
ونعيس يتلونه هل الجيش وامهار =واليا تعايوا قال انا عندي الشور
اما هجاد(ن)من قبل وقت الاسحار =ولا صباح(ن)من بعد طلعة النور
اللي يعد امجادكم بين الاقطار =يحتاج له باحث مؤرخ ودكتور
امجادكم تبقى للاجيال تذكار =مثل الرصيد اللي للاحفاد مذخور
لو يشرح التاريخ عن كل ما صار =يشفى ضمير اللي من الغبن مقهور
تم الكلام اللي تخيرته اخيار = اقسم قسم يا شيخ ما قلت به زور

كفـو والله

الكل يمدح الشيخ برغـش بن طـواله


كفـو لأخـو صـلفـه

رحمة الله على روح الفارس ( ضـاري بن طـواله ) شيخ الأسلم اللي التاريخ نقش اسمه بأحرُفٍ مِن ذهَب .

ضاري اللي شهد له القاصي والداني بمشيخته وفروسيّته وشجاعته مِن شمّر ومِن غيرهم

والبرَكة بأحفاده طيبين الأنسال




صـح الله لسانك يا :

( أبـو بـرجــس )

بارك الله فيك

حنا نبخصك ونبصم لك ما تقول إلاّ الحق ولا تمـدح إلاّ من يستحق المديـح

يسـتاهل المادح والممـدوحين