أنا بدوي وأعشق تواريخ الأجداد=وأقولها ليت الزمن بي يعودي
هاك الخبر كانك عن المجد نشاد=شعري بهم غصب ٍبيوته تجودي
لاحل بالوسمي مع البرق رعّاد=أستبشروا لاظلمت بالرعودي
شبوا حطبهم تالي الليل وقاد=تعللوا وأفراحهم به تزودي
بيت الشعر يندى مع الغيث يزداد=سعادة ٍ مامثلها بالعهودي
حل السعد في دارهم والفرح عاد=عقب التعب عقب الشقا والنكودي
وأليا سمحوا من دارهم شد رواد=أقفى ليالي للخباري يرودي
ثم عاد لدياره مع الصبح منقاد=معه الخبر يوم أرسلوه الفهودي
قال العوض ياهل السطر حد بغداد=أرض ٍدعث فيها الخزاما يسودي
شدوا على زمل ٍ بهن زود وشداد=يوم أقرشن راع السلف له يقودي
مع طلعة النجمه تعدوا الأجواد=أقفوا يدوسون الوعر والنفودي
ساقوا مظاهير ٍ لهن ذكر وأمجاد=شقح ٍ ويتلي تالي الشقح سودي
ذود ٍجنبهن في يمانيهم حداد=حداد للي يقربون الحدودي
ومشنشلاة ٍ تفري نحور الأضداد=لافرعن له ناعمات الخدودي
أومى بهم وأودع شرايدهم أبداد=فرسانهم ذبحوا ماغير الشرودي
راح الشرود وحيلته عض الأنجاد=قومه تزايد غبنهم بالكبودي
والقوم الآخر يومهم مثل الأعياد=وفي ضفهم هاك الغنوج العنودي
زينه طغى وبراسها عز وعناد=تذبح عرب في خصرها والنهودي
وأن سلهمت خجت سليمين الأكباد=زين بدويه كامل ٍ بالجعودي
ذولا البدو في ذكرهم طيب وسناد=لاشك باحت من كرمهم سدودي
كم فارس ٍعقب السطر حدر الألحاد=مر الزمن لكن بقى له شهودي
واليوم في نعمه بلا خوف وأنكاد=في ظل حكام البلاد السعودي
نبذه عن الماضي بلا زود وأنقاد=تاريخ باقي لليالي يذودي
أقولها وأفخر بها قدم الأشهاد=عزيز راس وبالبطاقه سعودي

المشاركة الأصلية كتبت بواسطة ابو حارث المدعول (المشاركة 827266) أقولها وأفخر بها قـدم الأشهـاد عزيز راس وبالبطاقـه سعـودي صح لسانك . اخوي عمر الهمزاني والله لا يهينك

المشاركة الأصلية كتبت بواسطة السكب الأسلمي (المشاركة 827271) ساقوا مظاهير ٍ لهن ذكر وأمجـاد شقح ٍ ويتلي تالي الشقح سـودي ذود ٍجنبهن فـي يمانيهـم حـداد حـداد للـي يقربـون الحـدودي ومشنشلاة ٍ تفري نحور الأضـداد لافرعن لـه ناعمـات الخـدودي الله يرفع مقدارك ولله دررررك وصح لسانك اخوي الفاضل الشاعر عمر الهمزاني قصيده استمتعت وانا اقرئها بصراحه صفحه شعريه مشرقه من الماضي الأصيل تقبل مروري وتقديري