قصيدة بمناسبة إطلاق سراح الاخ و إبن العم : خالد بن مسير الشمري من السجن اللذي كان صادر بحقه ولمدة خمسة عشر عاما ً في دولة الكويت وذلك له بسبب يعرفه الجميع و قرأه الكل بعد تدخل شيوخنا اللغيصم جزاهم الله خير وجعلها الله من موازين أعمالهم وحسناتهم و من عاداتهم أخوات جوزاء حيث قام كل من الشيخ : جديع بن عواداللغيصم شيخ قبيلة المسعود من شمر و الشيخ : فهيد بن عواد اللغيصم أبو سطام وجابوها هل البلهاء بعد أن تدخل سيدي صاحب السمو الملكي ووزير الدفاع الأمير / سلمان بن عبدالعزيز آل سعود حيث قام بمحادثة أمير دولة الكويت الشيخ / صباح الأحمد الجابر الصباح وقام أخو مريم جزاه الله عنا خير بإصدار العفو عنه و هذا حنا و هذولا حكامنا يا الخليجيين يدنا وحده و مصيرنا واحد ومتحدين فكانت هذه المشاركه المتواضعه مساهمة مني وواجب
يا الله يا اللي فارق" يوم عن يوم=يامن خلقت إبنادم من الترابي
يامِنزِل"جبريل من فوق حيزوم=ومِنزل على طه النبي الكتابي
عفوك ولطفك وإستتارك لنا دوم=أجيرنا ياربي من العذابي
البارحه على أول إغفاية النوم=تقول جاني يا الرفاقه منابي
يقول مايحتاج للطيب تعلوم=ليا إجتمع طيب الأصل والمرابي
الكذب يبهت كل رجال محشوم=والهربده تمله رزين الشبابي
المشكله لاصرت ماكول مذموم=منهو عليه تلوم منهو تعابي
خطو رجل ماغير هو زول و هدوم=بلشان في كي الغتر والثيابي
لامن لفا كنه على الصدر جاثوم=لا ياملا الفرقا يمالا الذهابي
وقت اللوازم شخص ما هو بملزوم=دغلوب خبرا عايش "عالجوابي
المرجله تبيله حزام وعزوم=ورجال مايجامل ولايحابي
وحنا لنا طبع" وعادات وسلوم=وعلى المعالي متعبين الركابي
عن الخطا مافيه مخلوق معصوم=لو ماخطا ماكان جزوا ثوابي
وخالد خمس طعشر سنة سجن محكوم=مافيه لا صفح " و لا يستتابي
صدر بها صك" وأمر" ومرسوم=مصدق"متلي بحكم "نيابي
ماتنفع محاماه مبرم و محسوم=وصكت كلاليبه وكبر المصابي
وصحنا لأخوجوزا سعد كل مغموم=شمس السلام ليامن النور غابي
فهيد أبوسطام والخصم مسطوم =حر"تعلا فوق روس الهضابي
وناض الفهد يوم الردي عجز لايقوم=متنحر" سلمان دمث الجنابي
قال الوفا حنا هله قبل هاليوم=ياسيدي مابالطنايا إرهابي
وجاب العفو وإمصعر الوجه مثلوم=والضن في سلمان مايوم خابي
سلمان فلال الفواليذ داحوم=فرن الحديد اللي خصومه تذابي
حصن"حصين وحصن الأنذال مهدوم=ينعق غراب البين فوق الخرابي
سلمان في كوم" والآنام في كوم=ياأهل الهنادي والتفق والجنابي
حامي ثقاله مزبن الجيش شاكوم=طير السعد فهق الجناح العقابي
سلمان لو ما أبوفهد كانت علوم=سلمان لو ما أبوفهد ماتجابي
باب الفرج والفرحه لكل محروم=بالعون ماقد قال قفلت بابي
نضايض السادات قهارة الروم=آل سعود مكملين النصابي
من بعد ست سنين والأمر محتوم=في واحد إثنين" تجلى الضبابي
بأمر الله وثم" بأمر مرجف القوم=شيخ الكويت ونسل حصن الطلابي
أصدر خطاب موقع وأمر مختوم=توجيب لآل سعود قّـّـدر وأجابي
وعقبه بنفس العام يوم أنصف الصوم=منع السفر إلغي بفكس" خطابي
نفس السنه زيلت عراقيل وهموم=ونفس السنه برين جروح" عطابي
سلمان"وخشم الظلالات مكصوم=يا جاحد الوقفات وين إنت رابي
مغفور لك ياعود جبته ومرحوم=وتنعم بفردوس الجنان العذابي
هذي عوايد سيدي يفرق السوم=لابارت الفزعات في سوق رابي
وهذي عوايد كل قرم "وزيزوم=وكل صيرمي" هيلع وسبع غابي
ماني بمدح مسطـّـر الغوش مليوم=واسقم حالي عقبهم واشيابي
وفهيد مفراص البواليد قيدوم=نطاح طابور العدا مايهابي
لازوع البيرق وجا يتبع الحوم=يطشهم كما طشاش الحبابي
على كبود الضد حنضل وزقوم=وعلى أصدقاه تقول سمن" عرابي
له مجلس بعطرين الأشناب مزحوم=وصب القريشيات مثل الخضابي
وصياني"مردومه شحوم ولحوم=هذيك تفهق ثم هذي تجابي
نعم" بأخوجوزاء ذرا كل مضيوم =وعشرة نعم ياباغيين الجوابي
شيخة صمايل ماهي بشيخة ختوم=ودامه معانا ماضربنا الحسابي
عدونا مخذول ماخوذ مجحوم=والسيف يبرق كنه لسان دابي
ومن عادة اللغيصم ليا جيت مظلوم=يفرعون مروضين الصعابي
من غير حب كفوف وكتوف وخشوم=أمرك مطاع ومطلبك مستجابي
ماهو قصور بكل طيب وشغموم =لاشك أفاخر بأهلي وإنتسابي
شمر ليا دكت سليما و سلوم=مخضبين سيوفهم والحرابي
دوم إنترفع عن الأنذال ونشوم=عن كل نقص وكل مايستعابي
على النعم نتعب ولازامت نزوم=ونقدم لياصاب العفون الرعابي
إبنادم"رزقه مقدر ومقسوم=ويومه مقدر عند مجري السحابي
دنيا"ولابدك على القبر مزهوم=لوتوزنه ماجات جنح الذبابي
ياالله يا اللي فارق" يوم عن يوم=إغفر لخلق"خالقه من ترابي
عن الخطا مافيه مخلوق معصوم=لو ماخطا ماكان جزوا ثوابي
(( يا سيدي ,,, ما بالطنايا إرهابي ))
العرض الشجري
