حضيري

هات القلم واكتب الأشعار ياحضيري= نبي نسلّي خفوقٍ ضاق بسكاته
دقق معي بالشعر وركّز بتحضيري= في دكة الشعر هيضاته وروحاته
هواجس بالحشا هاضة طوابيري= ونفسي زعول وصدري زاد وناته
خلك معي بالسفر لو به مخاسيري= نشغل خفوقٍ مشى في عكس مشهاته
ندله مع الوقت والأيام تمريري= والعمر محدود والأوقات فواته
نبي ديارٍ زهى نبته نواويري= فيه أم سالم تعيد الفن بصواته
من مدلهمٍ هواها شرق ويزيري= نطح زعوج الهوى ونزّل لشحناته
من فوق اللي بسرعته يعطيك تحذيري= يا دست بنصه يزيد أجنون زفراته
فوق أسرد يصفّر الأميال تصفيري= والبعد طبلونها يطوي مسافاته
ساعاتي الخمس يديني على القيري= ومواطي الرجل مشغوله بدوساته
وأن صارة أرضه طلوع وبه محاديري= وجسمه ليان يغوص بقدم ما طاته
من ضغط الأقدام شكمانه تقل كيري= لا تنشحن وانت بيـدينك مقاداته
وطعن نحور الفيافي والمخاطيري= بأرضٍ قفر فيه فرق الضان ما باته
بمخطط المدن ماله فلم تصويري= ومهندس القار مابه حط بصماته
عقب التعب والسفر وقطع المشاويري= تنزل بدارٍ تفوح أرياح نبتاته
نحضر جروم الحطب هي والمباهيري= والشاذليه بجنب النار وحضاته
يصبه اللي يعرف الكيف ويديري= ريحه يرد النفس مع فوح طبخاته
بحضور ربعباً لهم حشمه وتقديري= وعند اللزم تكره العدوان وقفاته
ما تاجرت في جلود الضان والفيري= ولا جاملة بالخطا من شان حاجاته
أقروم قوم تبيد المال والميري= ماهي من اللي تتاجر في ثمن شاته
وناسة الوقت بأقصادٍ وتحريري= وضغوط الأيام به كاش معاناته
ما يرجع العمر بنظامٍ وتحويري= ما راح من ساعةٍ ياكود رجعاته
يالله لطفك وعفوك وقاسمة خيري= يا مدبر الكون ومتحكّم بساعاته
أحسن عمل تكتبه ختام تقريري= وحسناتنا تجعله ممحاة سياته
وختمت مابرمج الخافق وتفكيري= بأزكى صلاةٍ عدد ما ساعةٍ فاته
= شعر / بهلول حمدان الشمروخي