{ مضى لي هلالين وهلال وهلال }

بعد السلام وأرقى عبارات اللقاء والاحترام





مساء/صباح الخير والرضى والطمأنينه





من الجديد أرجوا أن تنال على رضاكم






.

يادمع المشاريه يكفي ترى الحال=عليها الطواري مطاليع وادخول
تعايبت ستر الخفاء افبعض الأحوال=كذا طبع الأحرار عادات واميول
وكسرت المشاعر على صمت الأقوال=وتنثّر شعور الحنايا على القول
يدور القدر في حياتي على اعجال=وتمرّ السعادة علي مرّ هملول
مضى لي هلالين واهلال واهلال=لي أربع شهور وشقى البال مشغول
أدرت الكتوف وسفهت أنس الأزوال=فركت الكفوف وقسى الجرح محمول
تهادم سطوح الحقيقة وتنهال=وتطاول صروح الهواجيس واتطول
عن الواقع أصبحت راحل ونزّال=أغيب و حضور الوعي صار مجهول
سوالف عناء بين شايل وحمّال=مفاتيح ضاعت ومن دونها اقفول
أسامر نجوم السماء ضيق وأنكال=أنا والسهر نطوي اهضاب واسهول
دجي الليل خيل وجفى النوم خيّال=عنانه غرابيل وأوهام واحمول
وأنا فوق خيلي دحمت أرض الأدغال=وشفت الحياة اللي أسراره اذهول
وش أوجع من دموعٍ أبكت له ارجال=غبن حرٍّ أمسى على ظلم مفعول
جفى افراشه و حاله أحوالها أهوال=تضعضع ودمّ الوجه طاح مقتول
يديّ الليالي بنا صفعها طال=وشرّ المحاقير من بيننا ايجول
جبين الكرامه لحت جلده أنذال=عجايب زمن شوفها يخلف اعقول
دفقت الفناجيل كبّيت انا دلال=وطيت الجمر من قهر صار مغلول
و رميت الهقاوي رمي رثّ الأسمال=فقيرٍ لقى له صفى جوهر ولول
خذيت العمر وادي ونفسي اجبال=سحابي دعاء الرب في ميل واعدول
و زروعي رضا ذات وإيمان وإجلال=و حصادي رجاء أجرٍ وعفوٍ على اقبول
وشعري غدى سدره وصدري اظلال=صباحي يمينه وعصري على اشمول

.





وسـلامتكم

أخوكم/

الـقـفـيـعـي - جليس الدار