وصـيـة الشاعر فيروز بن خلف القفيعي ابن رمال الشمري امير قرية قناء رحمه الله وهو يوصي بها اخوه الأصغر سالم بن خلف يقول أبو خاتم فيروز:
مابي أتمنى والمنى به سهاله
يصلح لخاوين العزايم والانذال
يصلح لمن قضى حياته ختاله
لاشب ناره ولاعني لـه ولايسال
ولانوخت عنده قوافل رحاله
هذاك طراش وهذاك حوال
نبني قصور العز ويلقى ظلاله
الضيف واللي يقضي القيظ نزال
هذاك محتاج نصلّح حواله
وهذاك مشّاي نواسيه بظلال
نضرب على الكايد وفعل الجماله
بعزايم ما يقدره كل رجّال
يوم الردي يبخل بحاله وماله
حلالنا للي غدا يمنا حال
نجود به يوم ونلقى بداله
والرزق عند اللي للمهمات حلاّل
ياسالم حط المرجلة لك زماله
واحرص على جيب الفضايل والانفال
ترى المراجل بالمراجل تناله
والطيب يدرك بالمرّوة والافعال
وصية من عندنا لك رساله
نبيك تحفظها على كل ابو حال
النار لاتطفي وحضّب دلاله
واعمل لنا من الكيف مايشرح البال
دنياك لو طالت يقرّب زواله
ولايبقى كود علومها مثل الاطلال
وســــــــــــــلامتكم