جاني اتصال ٍ من سليل المناعير
الصاحب اللي يحتمي واجباته
يقول غايب عننا ياعسى خير
مثلك مجاليس النشامى شفاته
قلت الامور بخير والصحه بخير
من فضله اللي ماتعدد صفاته
وبجاوبك ماني مدور معاذير
قول الصحيح الواقعي ياحلاته
المجتمع صابه مع الوقت تغيير
ساد الردى في وقتنا من رداته
هذا زمان الإمعه والغنادير
ماهو زمن من ينتخي في خواته
لاتيه حلت في محل المباهير
والبيت للتصوير ومناسباته
راحو هل الشبات هاك المناعير
خطو الضرير اللي تدله عصاته
شيباننا اهل النقى والتباشير
واهل البيوت اللي ندل عتباته
ماسولفوا بالنفط ولاّ الفواتير
ولا بالسياسه والردا والشماته
واللحين جمعتنا سوالف مشاهير
وكلن على الجوال ومسابقاته
وان سولفوا كلن غدا سالم الزير
ومحدن بهالدنيا يسوي سواته
هذا يخاوي شيخ هذا مع امير
وهذا مع التجار يسحب عباته
ياحول مايدري سفيه التفاكير
مساح جوخن بين وده وهاته
بغيب لو لي عندكم زود تقدير
ياصاحبن افرح بكثر تهلاته
هذي علومي قلتها لك بتبرير
وعليك رحمات الولي وبركاته