وقتٍ مضى مليان باالذكرياتي ** كنا صغار ومافهمنا الحياتي
فينا البراءة والطهر واضحاتي
من شافنا يقول هذولي اخوان
قلوبنا بيضاء ولا نعرف احقاد ** راضين باالمقسوم منقوص او زاد
ندرس ونتعلم ولانشكي إجهاد
واللي يدرسٌنا له الحب عنوان
نصٌد عنه إن كان في السوق شفناه ** من الحيا ومن الخجل لاعرفناه
وإن شافنا كل المواجب عطيناه
نرد معروفه علينا باالإحسان
وانعكست الآية بذا الوقت مرة ** طالبك يمكن يلحقك باالمضرة
عساك تسلم منه وتفٌتك شره
ماهوب طالب صايرٍ تقل شيطان
كبير السن ماله أي إحترامي ** ورعٍ يهينه جاهلٍ باالكلامي
مابه حيا ولايخاف الملامي
هذا زمن تقلبت فيه الأوزان
كثار ونسكن في بيوتٍ صغيرة ** في عيوننا احسن من قصورٍ وثيرة
واليوم بيوت الناس شرحة كبيرة
والضيق بأنفسهم له اشكال وألوان
وإلى سمعنا ابوي في البيت موجود ** من هيبته نفزٌ لو إننا رقود
البيت يهدى كله سهود ومهود
ياجعلهم باالخلد في عالي جنان
نجلس وناكل كل ابونا سوية ** ثلاث وجباتٍ والأنفس هنية
واليوم حال الناس صارت شقية
كن العيال اغراب في البيت ضيفان
الوضع كله صار فيه إختلافي** مع اهله يسكن مختفي مايشافي
تنافرٍ مافيه اي إئتلافي
وإن عاتبوه يصيح ويطول السان
عدت ثلاث عقود باالزين والشين ** ناسٍ فقدنا وناس للحين حيين
وأحدْ اختفى منهم ولاشافته عين
سبحان من بيده تصاريف الازمان
ياالله انا طالبك ياوالي الأرزاق ** هون علينا يوم يبسات الأرياق
في يوم فيه إلتفت الساق بالساق
واختم لنا ياالله برحمة وغفران
( احمد بن ناصر المحرج )