ياعلي ونيت ودموعي سكايب = فوق خدي مثل هطال المخيله
ليش يجفيني بلا ذنب وسبايب = ليش مايذكر ليالينا الطويله
يوم انا وياه مابين الكثايب = نقطف الكادي من زهور الخميله
والله ماكنا اصحاب ولا قرايب = حيلتي بالله ما باليد حيله
انت من لي نستشيره بالنشايب = اسألك بالله تجعلي وسيله
لاتخليني من الهجران ذايب = الخوي ياخوك مايترك خليله
ابتليت بحب منشول الذوايب = سيدي الموصوف بوصاف(ن) جميله
نور خده نوض برق(ن) في سحايب = والمعنق عنق ريم (ن) في مقيله
والصدر بلور يزهو بالترايب = كنهن تقاح رابي في غتيله
سالبني ماخذ إفوادي نهايب = متلفني حب ابو عين(ن) ثليله
هايم(ن) في حب مسود الروايب = ضاع برهان الحشى والله دليله
اشهد إن الحب دلاال المصايب = كم غريم(ن) فالهوى امسى قتيله
والهوى راعيه دومه في نشايب = وعذابه من عنى الخثرات ويله
إن بغنك بادرن صارن حبايب = وسترنك بالخفول وتحت شيله
وإن جفنك ماطلنك بالكذايب = عن مقامك غادرن شدن رحيله
والختم صلو على سيد الحبايب = محمد اللي بالهدى نتبع سبيله