مجاراتي لـ سعيد القرني

لا تامن الحية ولا تامن الداب
والعقرب اللي حول بيتك مداها
:
اقطع ذنبها بالحجر وانتف الناب
واخرج خلايا سمها من حشاها
:
واقفل بوجه الخاين الخادع الباب
واوسم وجوه الغادرين و قفاها
:
ماكل من مدو لك ايديهم أصحاب
تبين مدات الوفاء من دفاها
:
وإلا الردي لو مد بالورد كذاب
حتى وروده بالخيانه سقاها
:
لولا جحود الطيب ماشاب من شاب
واهل الخيانة ماتشيب لحاها
:
إذا عزمت احذر تردد و ترتاب
أهل العزايم ما تناظر وراها

الشاعر/ سعيد بن ناصر القرني

مجاراتي:

لاطاب نوم الهيس ياسعيد لاطاب
و السالفة تُبنى على محتواها
//
خطيت لك يا سيد الشعر بكتاب
وغير الحقائق ما كتبنا سواها
//
شيٍ تعلمته من البدو الأعراب
وإلا من الحضر القروم النباها
//
حقائقٍ ماهي هناديب واتساب
ولا كِذا جت من خلاها بخلاها
//
ما للفتى بدٍّ على فعل الأسباب
و الذاهبة تلقى عشاها و ماها
//
أما مقادير الولي رب الأرباب
لا بـد لـ: عيـون الخـلايق تـراها
//
وإذا الوطن تنبح حوالينه كلاب
أمرٍ طبيعي ما لها إلاّ عواها
//
ولوكل من مدولك ايديهم اصحاب
كان الخلائق شامخة في سماها

أبومعاذ
فهد بن رميزان الشمري