خذ الخبر مني ملخص بقرطاس= وبصمة بهامي وبالبطاقة سعودي
من دولةٍ بالمملكة حكمهم ساس= ما هو خليط من العجم والهنودي
حديدهم ما خالطه صفر ونحاس= من الصافي البالوذ ساس الجدودي
وحنا السّعوديـين ما نقبل البأس= حتى نموت وننقبر باللحودي
نصبر على جور الليالي والإتعاس= كما صبر صخر الصخر من الحيودي
ولنا الشرف بحكومةٍ ترفع الرأس= تدوس من داس الوطن بالزنودي
أخوان نوره يا اختفاء كل هلاّس= تبيـن ليا أستسلم خطات الشرودي
أن صار حرب وضرب للبيت حرّاس= وناره جماجم روسهم له وقودي
سربة هل العوجاء ليا دق الأجراس= ما تـنحني يا كود لربه سجودي
ربعٍ يعظون النواجد والأضراس= بمواقف تموت وإلاّ تسودي
وتحفظ حقوق الجار وتقدر الماس= وتفزع لمظيوم زبن للحدودي
ما تشتكي لون حرش القدم داس= ترسي كما ترسي جبال الزيودي
وإلاّ كما يرسي جبل طي وضراس= وتصبر على جور الزّمن لو يكودي
ما تـنـزل الهامة وبهم روح ونفاس= مهما جحد فعله غشيمٍ جحودي
مثل الصواعق ضربهم يشطب الرأس= وعصيانهم تقص صلب العضودي
وتجود من ما جاد به خالق النّاس= وان شح وش به يا السنافي تجودي
والخاتمة صلوا عدد رمل الأطعاس= ما نسّفت صلف الرياح النفودي
على رسول وضّح الحق لناس= شفيعنا عند أنشقاق اللحودي
=شعر/ بهلول حمدان الشمروخي