قصيدة - العوني - المشهورة وفيها يحث شمر على التكاتف والتلاحم ،
وقد فعلت هذه القصيدة مالا تفعله السيوف حيث أثرت فيهم وكانت سبباً في تكاتفهم وثباتهم :
عزي لقلبن كلما قرب الليل = عليه صارنّ الدقايق جلايل
أعتاض عن طيب الكرى بالتعاليل = بافكار واذكار وقولن وقايل
والعين كن ابموقها يدرج الميل = عيت تطيق النوم من فور جايل
على بني عمي سنادي عن الميل = نطاحة الكايد كبار الوهايل
أقفوا كما مزنن ثقيل المخاييل = من زاعج الغربي حدر له شعايل
شمر مقابيس المنايا هل الخيل = عصم الروايا مقحمين الدبايل
يادار وين اهل المهار المشاويل = أهل النزول اللي تعزّ النزايل
بكيتهم يوم ارتكم فوقي الشيل = وذكرتهم يوم اقبل الضد صايل
وصاح الصياح وطوّحن الهلاهيل = وهلت دموع امعكرشات الجدايل
وقلت ابشرن مادام بالعمر تمهيل = مادام مارزّت علي النصايل
لا تبكن الوحده وقل الرجاجيل = مادام عين الله علينا تخايل
وظهرت أنا باسم العصاة المشاكيل = لو هم قليلن يدركون الجمايل
هم حاصلي لا كملن المحاصيل = غوش الجبل خزنة غلامين حايل
باعوا عزيز العمر دون المضاليل = وحموا حماها مقدمين الفعايل
قالوا عليهم قلت زجوا هل الخيل = وقهرتهم غصبن ووردوها غلايل
وأدنيت هجنن يقربن المحاويل = هوجن هجاهيجن هجافن نحايل
علاكمن تطرب قلوب المراسيل = خفقات رقات صلابن جلايل
قلايصن عوصن صعاصع شماليل = من سلسلة نسل السباق السلايل
الصبح مدّن كنهن جولة الريل = فيحن علت من فوقها ارجال حايل
وصبح اربعن تلفي نزولن كما الليل = شمر اليا عدت فروع القبايل
أدنى بالادنى خبروهم بتفصيل = لا تسفهون اصغارهم والجمايل
ولازم اليا شافوا ركابن مقابيل = تلزمهم النشدات عن سكن حايل
قولوا لهم يامقبلينن على حيل = نجدن واهلها يطلبون الاوايل
جونا هل العارض بقومن كما السيل = يبغون دارن هابها كل عايل
وجرى لنا يومن بياطب به الشيل = يطيح ما تثني عليه الرحايل
واضفا على عكاش مثل الهماليل = ياطول ما حنا لهم بالاوايل
وين الطنايا وين شرابة الهيل = وين الجمال اللي تشيل الثقايل
وين السيوف اللي تعدّل عن الميل = وين الرماح اللي تحت كل عايل
وين النشامى والعصاة المغاليل = وجميع من ضربه تضيع الدلايل
نشرب بهم صافي القراح الشهاليل = وننزل بهم غصبن على كل طايل
غلبا ترى بلدانكم لبست النيل = تنخى الرجال امكرمات الاصايل
تنخى هل العاده كرام الاسابيل = يوم التعازي والدخن له صلايل
قلته وانا معكم على العدل والميل = لعل ما نعتاض عنكم بدايل
تمت وصلوا عد وبل المخاييل = على نبي الحق مازال زايل