(( غزه ))
عادي غدينا نقبل الذل والعار=ياكيف صار الذل والعار عادي
نعجز على راس العدو نطلق النار=ونرمي على راس الصديق الهوادي
نصبر مثل صبر المهادي على الجار=على تجاوز واحتقار الاعادي
مع فارق التشبيه معنى ومعيار=عن صبرنا حنا وصبر المهادي
صبر المهادي صبر قوه ومقدار=وحنا صبر من ضعف والضعف زادي
سباقنا فايز جمل فايز حوار=فازت جياد فلان فازت جيادي
هذي بطولتنا على كل مضمار=كلٍ يغنّي عيّدي يابلادي
من صالة اسهم ندخل بصالة قمار=والكل يعمل في نشاط انفرادي
ومادام باقي نفط في جوف الابار=وحنا قصايد في مناخ اقتصادي
والنفط لو ينشف نولّي وينهار=ماعندنا مصدر عليه اعتمادي
استهدفونا في لعينات الافكار=وبالكيك الاصفر والحليب الزبادي
وجبات من لحمة خنازير وابقار=تقوم في هدم القيم والمبادي
وغزه تصيح وتطلب العون والثار=والقدس بالصوت المجلجل تنادي
بإسماعنا خلاطة اسمنت واحجار=وابصارنا فيها يذر الرمادي
ازمة ثقه وازمة مفاهيم واثار=خلاف حزبي واختلاف اعتقادي
كلٍ مع الثاني لعب عدة ادوار=بالغدر وافـسدنا صـلاح الـنوادي
والامه الـلي بـينـها الغـدر يندار=صعيب تظهر في قرار اتحادي
ولازال بالامـه صنـاديد واحـرار=بقلـوبـهم مايـستـقـر الـسوادي
يهمهم توحيد وجهات الانظار=ويهمهم للصلح مد الايادي
واذا توحّد صفنا عزم واصرار=ضد العدو نقدر نقيم الجهادي
ونقدر نجدد معنويات الانصار=ونلقي على وجه الضلال الرشادي
ونظهر من اصلاب الوهن جيش وامار=الفين قايد في تصرف قيادي
ونيـازك الـنخوه بـليغات الاضرار=تـنزل على صــهيون في كل وادي
ارواحـنا مثل انسيابات الانـهار=تنساب يوم التــــضحيه والتنادي
واللي يمـوت بجـنة الخلد لـه دار=شهيد مانعلن عليه الحدادي
ذيب الشمري
3 / 1 / 2009
غزه لذيب الشمري
العرض العادي
