الكبد باتت يامحمد عليله = وقلبي اللي بين عذال ومشير
البارحه ياخوي واطول ليله = كني سكنت بوادي من زمهرير
من واهجً باالصدر مثل المليله = ضيعت انا ليلي بهم وتحاسير
وعيني اللي مايبطل هميله = يكن صبي العين يضرب مسامير
الله من نارً تزايد شعيله = يتكل ينفخ باالضماير لهب كير
كني خلوج بلشت في عويله = غدى ولدها بازدحام المظاهير
ودلت تعب النزل مثل الهبيله = اقفى ولدها مع نجوعً معابير
واعزي لمن مثلي مضيع خليله = لوا شقيقي طاح في طية البير
اخوي شيال الحمول الثقيله = اللي يشيل مثقلات القناطير
شيال حمل اللي عجز لا يشيله = ياثقل شيله وابعدن المسافير
حمله ثقيل حيل ماينقويله = عليت يابليهان ريف الخطاطير
له ربعةً دوم النشاما تجيله = تاتي مشاكيلً لبيته مسايير
حلال قالات بفتل وحيله = ليا ثقلت القاله وصارت مشاوير
ريف القصاير يوم يكوش مكيله= ريفً لربعه باالسنين المعاسير
آمر عليه الحق وعجل رحيله =مرحوم ابو خالد زبون المخاسير
بكن عليه ناكضات الجديله = وبكوا على فقده رجال مشاهير
قلته وانا ماكنت راغب لقيله = اجهرتها وصخرت انا القاف تصخير
ياالله انا طالبك بكل وسيله = تغفر لمنيس وتجعله من هل الخير
وتمت وصلوا عدد ماسال سيله = على نبي الحق راعي التباشير
قصيدة رثاء جدوع ابن سعدي على شقيقه منيس ابن سعدي 1963م
العرض العادي
