مما قال الشاعر هذال بن ذرية
بالأمير/ عبدالعزيز المتعب الرشيد (الجنازة) :-
يامل عين نومها بالتهولاس=من ليلها ما ترقد الا قليله
من شوفها فعل السلاطين بالناس=تفطنوا ياهل القلوب الهبيله
سعدون تاه ولا معه ميز وقياس=سراي ظلما تايه ٍ به دليله
لعب به البحار دوار الانجاس=يبي يوفي به وقود الشعيله
يسوق له عفر مقلدها الاجراس=ماله لزوم ولا شعار يجي له
ورمى به الله من بعيدين الامراس=للمجزر اللي شاف باقي حصيله
واقفا معيف عقب ماشاف واقتاس=ادبر وتال القوم ما ينثني له
ماحصّل الا لطم وجهه والافلاس=عقب المعزه رايح بالفشيله
والعفر خلاها والارياق يباس=تقاسموها كاسبين النفيله
واخوك خليته بعد شفت الاتعاس=وخليت راسه للضياغم تشيله
ولا هشت مع قومك ولا شفت منداس=يالله براسك رابح به عقيله
تبغي تقوس الحكم ماعاد ينقاس=دونه عصات بالسيوف الصقيله
دونه ولد متعب وللحكم سياس=انا اشهد ان الحكم له يستوي له
يضرب بسيف باللقا يقطع الراس=ماناس من حد المناكب يشيله
ودونه حمود لابس الدرع والطاس=يكسر نصاب السيف هو والجليله
وكل الرشيد لهم قدايم وفراس=ما يتقون ان جا نهار الدبيله
ضياغم ٍ من فوق شحص الافراس=كم ذبحوا قدامهم من قبيله
عبدالعزيز الحر قطاع الامراس=شيخ الشيوخ وكل شيخ يجي له
سقم الحريب اللي تبين بهوجاس=ياويل والله واحد يعتبي له
يمسي حريبه طاوي الخط بالياس=ويصبح على الساقات تذبح رحيله
واليا انتهض تتليه من قومه اجناس=مثل الدبا الكامت نهض من مقيله
واليا لبس هو ولابته زين الالباس=ثم احتزم من فوق بنت الاصيله
وادلى على حمر الطوابير ممراس=واليا اعتزى جعل الملك يلتجي له
ماهو بخيال يعرض وجساس=لا حل بالصابور خطو الدبيله
راسه يجي من ساكر العج طماس=مارده الا السيف يقطر وشيله
ماني بوفاد شحود ونحاس=امجّده والنفس مني جليله
كني اليا جيته معي مال عباس=ربيع قلبي يوم ازوره واجي له
ان كان ابو متعب سلم لي من الناس=ماهمني كثر الحلال وقليله
دمتم بود