جاب الرماحي له علوم نظيفه ( قصة وقصيدة غزو الجعافره من عنزه للجرذان من شمر)

أتى جيش الجعافرة من عنزة غزو لديار شمر وعقيدهم يقال له الشقاوي ،ويوم وصلوا (( جو رميص )) جنوب الشبكة وهم في طريقهم وجدوا إبل (( ضبيب المايق )) وكان ضبيب نايم عند إبله فغدروه وهو نايم(لأنه كان أصقه) وخذوا إبله وفرسه ورحلوا.. ركض ضبيب للعرب وفزّعهم واغارت سنجارة طلبا لإبل الجرذان وعندما ايّسوا سنجارة من اللحاق بالابل قالوا انهم أبعدوا ولانقدر نلحقهم ولكن نوعدكم يالجرذان بغزوة ونجيب لكم أباعر أطيب من أباعركم اللي وخذن ورجعوا لديارهم الاّ 15 من الجرذان و5 من الزميل رفضوا الرجوع وأصروا على ملاحقة عنزة،والخمسة اللي من الزميل هم:
1-غـــبــن بن عــلــيــان الــرمـاحـي ، من العجي من الزميل.
2-زبـــن بن عــلــيــان الــرمــاحــي ، من العجي من الزميل.
3-فـــرج بن ســعــد الــسـرعــوفي ، من العجي من الزميل .
4-نــحــو بن حــمــيــمــان الــشـيحــي من الشيحة من الزميل .
5-ســالــم بن ســايــر بن رغـيلان الــســلـماني ،من السلمان من الزميل .وهو الوحيد من السلمان اللي كان مع الغزو.

ثم تبعوا عنزة فقال غــبــن الــرمـاحـي حنا ترونا اليوم طلب وغزو بنفس الوقت وطلب إنه يطلع عن الجرذان (( يصير عقيد لربعه )) وطلعوا معه (زبن الرماحي) و(فرج السرعوفي) و(نحو الشيحي) الاّ سالم بن رغيلان رفض إنه يطلع معهم وبقى تحت امرة الجرذان، ومقصدهم من ذلك انهم اذا لقوا كسب يصير نصيبهم مثل نصيب الجرذان بالتساوي ولا يقسم لهم قسم بس..

ويوم وصلوا ((مقر الودعي)) بوادي ((الابيّض)) شمال عرعر داخل الحدود العراقية الان..
لقوا مخلول من البل حفيان ومنقطع، قال بعضهم خلونا نذبحه وناكله فرفض فرج وقال هذا باكر نفك امه وألايفه ونمرّه وانعله من وبر المخاليل ويرجع مع امه فتركوه ومشوا بطريقهم وتقدموا، ولحقوا القوم على حد (حوران) قرب (منطقة الرطبة) المعروفة غرب العراق وبعد مالحقوا القوم قاموا يسبرونهم من بعيد لبعيد ويوم غابت الشمس شافوا نيران الجعافرة شبّت ويوم قربوا لهم لقوهم ماشين عن مكانهم قال فرج السرعوفي لأحد خوياه اقعد بمكانك يما يجونك خوياك ولاتحركون يما أجيب لكم الخبر الاكيد وراح فرج يلحق القوم الى ان امرحوا وتأكد انهم امرحوا ورجع لخوياه ولقاهم بمكانهم يتحرونه وعلمهم ومشوا وبيّتوا جيش الجعافرة وانتصروا عليهم وفكّوا البل ورجعوا لديارهم ويوم وصلوا ديارهم، تقدم عليهم غــبـن الــعــلـيان الــرمــاحـي وبشّر العرب بالنصر فقصد شاعر الجرذان (سحيمان بن فروان):


جـانــا البشيــر وصبـح البـال طربـــــان=جاب (الرماحي) له علومن نظيفــه

أنـا احــمـد الـله تـو هــب الهــــوا زان=عــداد مـاهـلا الـمعـزب بـظـيـفــه

تحيزمـوا مـن فــوق طلقـات الايمــــان=ربـعـن يبوجـون الديـار المخيفــه

لحقــوا عشايـرهم على حد حــــوران=ماهـم زواريبـن قلوبـه خفيفــــــه

ربـعـي مواردهـم شــوردي ودمنـــــان=وشلاش شوق اللي ثمانه رهيفه

ويامروي عطشان النقوض ابوصرمان=ياشوق عسلوجن يرش القطيفـه

وعفية سلامينن على الكـود عيــــــان=والكل منهم شوق بنتن عفيفــــه

وابــوكـريـدي شــوق مـيـــاح الأردان=ياشوق منهي عن حليله معيفــه

حقن تغز البيض في راس مابــــان=لفكاكة الذود العفر هو وأليفـــــه

والنعـم واللـه بالنــواعس وفدعــــان=عذاب هـجنن لولحـن بالسفـيفــه

يارسل كان انك على العلـم شفقـــان=ياحسين قدم للشقــاوي بظيفــــه

ماهي قصايــدكم براعــي سلامــــان=يوم انت بالظلعان حدر الصريفه

اما قول الشاعر عفية سلامينن على الكود عيان فهو عم الــــرمــحــان والســــرعـــوفي وبن رغـــيــلان بأنهم جميعهم سلامين بحكم أنهم أبناء رجل واحد وهو سهيل ومن المعروف عند اغلب الزميل سابقا انهم يضمون (بعض) العجي للسلمان ..

اســمــاء مـن كــانـوا فـي الــغزوة:

الجرذان اللي ذكروا بالقصيدة هم:
شــوردي بن فــروان.
دمــنــان بن مــزيــريــب.
شــلاش بن مــزيــريــب.
مــعــجــل الــمــورك ( ابو صرمان ).
النواعس هم جــريــذي ونــعــيــس من الــمــيــاق.
فــدعــان بن فــروان.


أما الزميل الخمسة اللي معهم فهم:

1-غــبــن الــعــلــيــان الــرمــاحــي.
2-زبــن الــعــلــيــان الــرمــاحــي.
3-فــرج بن ســعد الــسرعــوفي.
4-نــحــو بن حـمــيـمان الــشــيحــي.
5-ســالــم بن ســايــر بن رغــيــلان الــسلــمانـي.

 

 

 

 

 

 

 

 

 

 

ماشاء الله على العلوم اللي تطرب البال

رجال تدافع عن حلالها ومالها يوم هم يتنازعون هاالوبرة ((الأبل ))بينهم

انعم واكرم بهم من رجال ترفع الراس

تحياتي

 

 

 

 

 

 

 

 

 

 

شكرا على القصة والقصيدة

 

 

 

 

 

 

 

 

 

 

يعطيكم العافيه على مرووركم

 

 

 

 

 

 

 

 

 

 

ونعم والله من السلمان بلاقصور بغيرهم من القبايل
حاشو العلوم الطيبة
وللمعلومية فان السلمان اثنين
السلمان من الزميل
والسلمان من الجحيش من الاسلم

 

 

 

 

 

 

 

 

 

 

والله ومليون نعم بالجميع , بالجرذان والزميل , إما الزميل فهم معروفين بأنهم هل الدبوس والحق المنكوس , ولاهو قصورن بالجرذان إلي نفتخر بهم من زمان وهالحين ولاهو غريب هالفعل من الجرذان والزميل