البارحه دمع الأسى حرّق الموق=حرارته بالعين جداً أليمه
حاولت أردّه رافعه ناظري فوق=لكن تناثر-مارضى بالظليمه
أسبل غزيره كنّه الديم ببروق=وأروت ظما خدّي سحابه عظيمه
دمعي ونيسي حزّة الضيق مدفوق=يلفي علي ويسوق معْهْ الغنيمه
شب اللّهب في داخل القلب طاروق=وناديت حرفي والمواجع زِعيمه
دنّيت لي صفر المعاميل بالذوق=واشعلت ناري باللّيال العتيمه
واركيت لي دلّه بها البن مدقوق=بنّ/ن يماني أشقر الله يديمه
ياكن فنجاله على كل معلوق=يبعد هواجيس الخفوق السقيمه
وأرخيت يدّي للقلم وأعلن الشوق=شوق المصافح للسّطور القديمه
خط القلم جرح/ن من العام مشقوق=أكتم نزيفه واظهر إنّي سليمه
لكن تفجّر ماكتمته بصندوق=وهاضت على قلبي جراح/ن عقيمه
بعد السكون اللّي تعايش بلا عوق=بعد السعاده والحياةْ الحميمه
سيّر علي الهم ولّع بي إحروق=والعين هلّت دمعها مستديمه
الله حسيب اللّي من الناس مخلوق=خالي ضمير ومابقلبه رحيمه
اللّي يبيع البنت في داخل السوق=اللي ماهمه غير سلعه وقيمه
ظالم يظن الحق بالدين ممحوق=مافكر إنه مرتكب له جريمه
ربّي وربّه خالق الشمس بشروق=هو الذي ينصف حقوق اليتيمه
صبري كساني والتحف عنقي الطوق=لبسه نجاتي والأمل من صميمه
مايرتضي ذلّ/ن من الجبن مسروق=ولايرتضي للرّوح بعض الهزيمه
مهما تعبنا بالزمن لازم نذوق=صبر/ن يقوّي عزمنا بالحشيمه
البارحه دمع الأسى حرّق الموق
العرض العادي
