حوار مع أهم فرسان شمر والجزيره العربيه ومن أشدهم بأسا" عبيد العلي الرشيد
وأرجوا من لديه الوقت أن يعد لنا مثل هذا اللقاء الكامل مع أحد فرسان شمر الكرام وهي
فكره مسبوقه ونريد أن يكون لنا نصيب الاسد منها..........
* صبحك الله بالخير يا شيخ ..
هلا يالله صبحه بالنور والرضاء والسرور ..
* شلونك يا شيخ بشرنا عنك ؟
بخير يا ولدي دامنا ارتحنا من الدنيا وبلاويها ..
* طال عمرك احنا في منتديات الطنايا نريد ان نستضيف في كل اسبوع فارس من فرسان شمر واليوم اخترناك انت ونبي نطرح عليك بعض الاسئلة وان شاء الله اننا نلاقي لها عندك جواب ..
تفضل يا ولدي والله يقدرني ان شاء الله على افادتكم ..
* ياشيخ ولا عليك امر نبي تحدثنا عن اسمك الكامل وتاريخ ميلادك واين عشت اول حياتك ؟
اسمي هو عبيد بن علي بن رشيد بن حمد بن خضير بن خليل بن جاسر بن علي الكبير بن عطية نسبة الى فارس بن طعان ومثل ما تعرف يا ولدي انا من الرشيد والرشيد اسرة حكمت حايل وتوسعت فيها في الفترة مابين عامي ( 1251 - 1340 هـ ) وكنت انا واخوي عبدالله العلي الرشيد من مؤسسي حكمنا فيها وننتسب الى ال خليل من الجعفر من عبده اكبر بطون شمر .
ولدت في عام 1206 هـ وانا اصغر من اخوي عبدالله بسنتين اللي هو حاكم حايل وكنت انا يده اليمين وقائد جيوشه وامنا هي علياء بنت عبدالعزيز بن حميان من ال جعفر .
اما ابوي علي بن رشيد فكان رجلا متدينا مسالما محدود الطموحات يشتغل بالزراعة وتولى جباية الزكاة للامام سعود بن عبدالعزيز وكنا من القربين للاسرة اللي كانت حاكمة حايل في ذلك الوقت واللي هم " ال علي " واللي نرجع حنا وياها لنفس الفخذ الجعفر , لكن انا واخوي عبدالله كان عندنا طموح اننا نستولي على حكم حايل مع ان ابونا كان دايم ينهانا عن افكارنا ...
* ياشيخ نبيك تعطينا لمحات من حياتك والمراحل اللي مريت فيها ؟
ياولدي انا كنت في ذاك الوقت امير وفارس وكل الشعراء يمدحوني وكان لي في هذا مواقف طريفة اذكر منها ان شاعر جاء يمدحني وقلت له ابكافئك بقصيدة ازين منها واطول وقال :
لا صار انا قصاد وعبيد قصاد =ما للعمى عند المفتح حذيـه
وبعدها هذا الرد السريع امرت له بناقة ويوم اخذها قام يتحسس سنامها بيديه وقال له الرجال اللي انا كلفته انه يعطيه الناقة " لا تخاف تراها سمينه " , ثم رد عليه الشاعر " ادري انها سمينه والامير ما يعطي الا السمينه , لكني اتلمس سنامها عله حط لي فيها خرجية " ثم جاني الرجال وقال لي اللي صار وعطيته المقسوم وقلت له رح دسه في سنامها قبل ما يخيب حدسه في كرمي ...
ومن المواقف اللي مريت فيها مع الشاعرات جتني شاعره يقالها " ظاهرة الشرارية " من اهل الجوف تستنجد من قوم يسمون " السبيلة " اشتروا منها شاة ورفضوا يدفعون قيمتها او انهم يتقاضون هم وياها وقالت :
ياعبيد عيو لا يجـون السبيلـة=عيوا معي للشرع يا عبيد يمشون
الحق ظلمـا والمصقـل دليلـة=ولاتنقضي حاجات من يتبع الهون
والحمدلله قدرني ربي ورديت لها حقها ...
وكانت هالشاعرة دايم تلفي يمي ومرة من المرات جتني تشتكي من بنتها اللي كبرت وصارت شاعره وصارت تسابقها للحكام وصارت اكثر منها شهره وقالت امها غيره من بنتها :
ياعبيد وحده من بناتي كوتنـي=كوي المريض اللي تجدد مكاويه
عرفتها الحكام ليـن اغلبتنـي=العفو كيف الكلب ياكـل مربيـه
لا وا حسايف نقلها فوق متنـي=غير الرضاع اللي لجسمه يغذيه
ومن الامثال اللي سارت عني اني كانت حوالي سنة 1275هـ امير لحجاج حايل ومرينا بأرض ياخذ اهلها الخوة ( الضريبة ) على الحجاج ولما جانا مندوب صاحب الارض قلت له " قل للي ارسلك ان ذولا حجاج حايل وانا عبيد بن رشيد " وبعد فترة رجع لنا المندوب ناقل رسالة عمه يقول " كل عبيد بديرته " وبصراحة فاجئني الرد واعجبتني شجاعة قايلة ودفعت لهم خوتهم وصار هالمثل هالحين يتداول بين الناس ...
* طيب يا طويل العمر نبيك تحدثنا عن شاعريتك ؟
ياولدي انا من اسره معروفة بالادب وفيها شعراء كبار ويكفي اني انا واخوي عبدالله وامي وولدي حمود وضاري ولد ولدي فهيد وسالم وماجد عيال ولدي حمود كلنا شعراء , والى يومك هذا وفينا شعراء معروفين بزمانكم الحين منهم طلال العبدالعزيز الرشيد حفيد اخوي عبدالله رئيس مجلة فواصل و طلال العبدالله الرشيد واخوه فيصل وماجد الرشيد وخالد الجبر الرشيد وغيرهم ...
ولو رجعنا ياولدي شوي تشوف انه في فترة عالية الخصوصية من تاريخ المنطقة وهي فترة تأسيس امارتنا بحايل اللي انا شكلت فيها لاكثر من ربع قرن القبضة الحديدية والجناح العسكري واسهمت بالدور الاساس في توسيعها من الشمال الى الجوف ومن الجنوب الى القصيم ...
وايضا انا عشت في فترة الدولة السعودية الثانية موالي للامامين فيصل بن تركي وابن الامام عبدالله وعاصرت الحملات المصرية على نجد ...
وان كنت انا سخرت سيفي في ذاك الوقت لتحقيق اهدافي فأنا بعد سخرت شعري في المكافحة عن امارة جبل شمر ومحاربه خصومها وبالتالي كان اغلب نتاجي الشعري يدور في هالامور فأنا كنت دايم اهدد بقصايدي واقاتل برجالي الين ما وصلنا العصر الذهبي وهو فترة حكم محمد العبدالله الرشيد لكني انا ما لحقت عليها وخليتها لحمود ولدي اللي اثمرت تربيتي فيه وطلع مثل ما بغيته ولله الحمد ...
وبالنسبة للشعر كانت اغلب قصايدي في الحكمة والنصيحة والتوبة والفخر وكنت قليل ما اكتب في الغزل وان كتبته فهي قصايد قصيرة ما تذكر ...
* طيب يا طويل العمر نبيك تعطينا بعض القصايد ؟
ما طلبت غالي يا ولدي فيه قصيدة كتبتها يومي استولي على الجوف من حاكمها حطاب السراح عام 1254هـ وانهيتها بمدح الامام فيصل بن تركي السعود اقول فيها :
يالله ياللـي عالـم كــل مكـتـوم =الطف بنـا ياعالـم السـر والغيـب
تجعل لنا عرض عن الشين معصـوم =ياواحد نزهت نفسـك عـن العيـب
ابـن ادم مابيـن معطـي ومحـروم =من فضل من لا فيه شـك ولا ريـب
ياطير ياللـي حايـل تطلـب الحـوم =من فضل والي العرش مالك مطاليـب
الضد من ضيمك غشيش ومضيـوم = ومقصـر نقصـه بطـق العراقيـب
عقب الطفاخ وكثرة الهـرج والـزوم = صبـوا كثيـر علومهـم بالقواليـب
اللي فقد خلي مـن النـاس ماشـوم =وحاموا عليـه مورديـن المغاليـب
واضحى لنا الحربي من الناس ماسوم =وسم يخلي الشاة ترعى مـع الذيـب
واللي صدر حاموا على راسه الـروم=وساق الزمايـل حزبـه والمهاليـب
وخزني على باس الدهر راس شغموم= الليث ابو تركي مهـدي المصاعيـب
طير يخبط الطيـر وان هـد بجـزوم =هو منتهى نجـد وملفـى المراكيـب
بحـزم وتدبـيـر وراي ومفـهـوم =وان قيل من هو اعرفوا منقع الطيب
راس الجهاد ان قالو الدين مرجـوم =قيدوم ربع وان نخـى كلـن يجيـب
وان صار له حادث الدهـر ملـزوم =ناتي خفاف عقـب السـرا هراجيـب
واخدم لغاراتهولـو كنـت مخـدوم =يكفيه عن حكي اللسـان التجاريـب
وختمي عدد ما يزهر الليـل بنجـوم=منة على راعي الحـرم والمحاريـب
سماه والي العرش راحـم ومرحـوم =والرب يقبل دعـوه العبـد ويثيـب
وقلت يا ولدي في الفخر والشجاعة وصفو النسب اخاطب فيها احد خصومي واللي يسمى نعيس واقول :
يانعيـس مانـي كـاره للقوامـه = الا ولاهوب مكرهن حـرب ثـلاب
مقدم جموع كنها خشـم رامـه =تتعب طويـلات الجلامـد بلـداب
يتلون شغمـوم خوالـه عمامـه =من ضيغم مادق به عرق الاجناب
مع ذا الي جا الهوش عند الجهامه=يلقى الى جا عندهم حـزم كـلاب
وقلت بعد في الشجاعة والكرم ...
نفسـي تمنيتـي لرقـي السنـودي=ملابة توزي نفوسـه علـى الكـود
بحرابنا نـرى الحجـر والنفـودي= رغم على الزعلان والخد ممـدودد
من فوق قحص كنهـن الفهـودي =وملبوسنا بظهورهن صنـع داوود
وبايمناننا شغل العجـم والهنـودي =وشلف نرهمنهن على ركبة العـود
ومخيصنا دوم على الضـد يـودي = ونصبح على كبده من الصبح بجرود
والضيف لي جانـا نرحـب وزودي =ونحط له بالعسر من كـل ماجـود
مستارثينه مـن كـرام الجـدودي =طبع لنا من خلقة الحمـد محمـود
وافعالنـا عنـد العدالـه شهـودي =وقول بلا فعل على الرجـل منقـود
وما انسى قصيدتي المشهورة واللي صار اغلب ابياتها امثال يضرب فيها واللي تقول :
القلب من كثر الهواجيـس قـزان =ما يستريح من الدهر ربع ساعـه
يا غافر الزلة يا والـى الاحسـان= تجعل من التقوى لنفسي بضاعـه
انا علـى لان وربعـي علـى لان =متخالـف رايـي وراي الجماعـة
ماني بشاوي يربت علـى الضـان =ويعطي لطـلاب الجنايـا رتاعـه
انا ولـد علـي سلايـل كحيـلان =وربـي خلقنـي للسبايـا وداعـة
الناس ما تسقيك لي صرت عطشان = ولا يشرب المظمي حذا من ذراعه
اضرب على الكايد اليا صرت بحلان =عند الولي وصل الرشا وانقطاعـه
ولا فهم الله غير حضرة سليمـان= ولا صفـا كـدرة لبنـي اشاعـه
عيب على اللي يتقي عقب ما بـان=ويرضى طمان النفس عقب ارتفاعه
اما تجيب عقود حـص ومرجـان =ولا فهي لابليـس طـار بشعاعـه
وطرابة الدنيا مع الفجـر دخـان =وكرارة بأطراف خطو الصعاعـه
ومما قلت في الغزل :
هلا بمـن جانـا سلامـة معنـا = وبالطارش اللي جاب خط نصى به
عليك يـا نابـي الردايـف مثنـا=تريحيب مشتـاق بطبـه عيابـة
لـو الطيـور الطايـره يرسلنـا= ارسلت لك مع كل طيـر كتابـه
وقلنا لهن من روسكـن سلمنـا =ولقولن يقول فلان الـف هلابـه
ياهافي السرجوف لـولاك حنـا =عرساتنا صارت مساطـي كلابـه
قبلك ترانـي زاهـد فـي وطنـا = لولا علوم تلزمن وش لنـا بـه
واليوم صرنا مثل حربـه مهنـا =ارباحنـا مـا ينتعـدد حسابـه
يابو قـرون بالحجـب شرعنـا =ووصايف ما تنتوصـف حذابـه
واشافـي عـن لولـو يقلصنـا =الى مزح قامت تلاعـج عذابـه
كـن الشنـوف ومقلـده علقنـا =ريميـة لـولاه حمـر ثيـابـه
وفيه قصيدة قلتها يا ولدي في تهديد بعض شيوخ شمر البعيدين عن حايل مفتخر بعشيرتي وسطرتها على حايل اقول فيها :
ياشارخ اركب فوق نابي النسانيس =حر عريـب مـن هذايـب نداهـا
سير على عدوان ونوخ على نعيس=الـدار دار اللـي بسيفـه خذاهـا
ابو طلال الشيخ ذيـب الملابيـس = كم هجمة يقطع هله مـن رجاهـا
الدار لليتمان لـو يزعـل نعيـس = لو تزعل التومان واللـي وراهـا
دار لنا من قبل طـي الـى قيـس =بالسيف صبيان الضياغـم حماهـا
قبلك بهيـج حـدروه السناعيـس =من عقدة اللي مـا يحـدر قناهـا
* صح الله لسانك يا شيخ ومانبي نطول عليك نبيك بس تحدثنا عن اخر حياتك ..
بعد ما استقر الحكم لنا في حايل وبالتحديد بعد وفاة اخوي عبدالله الله يرحمه اتجهت الى نشر الكتب الاسلامية وطباعتها وطباعة المصاحف وكانت اول طبعه لتفسير الطبري من اوقافي , وصرت مرسول اهل الشمال الى الرياض ويوم حسيت بقرب يومي تصدقت بكل حلالي ومالي الا ثلاث اوصيت بهن لمحمد العبدالله الرشيد ولد اخوي وهي فرسي كروش انه ما يركب على ظهرها احد بعدي وزوجة لي شابة محدٍ يتزوجها وسيفي مصقول يغمد ولا يطلع من غمده ابد , وكانت وفاتي في عام 1282هـ وكان عمري سته وسبعين سنه قضيت اكثرها في الحرب والفروسية ..
* ماقصرت يا طويل العمر ونشكرك على حسن ضيافتك لنا وامتاعنا بحديثك وقصائد التي لا تمل ونودعك على امل اللقاء بك في جناة الفردوس ان شاء الله ...
حياك الله يا ولدي وادعوا لنا ولجميع موتى المسلمين بالرحمه ...
اللقاء الاسبوعي مع أشهر فريس شمر وينكم يالربع
العرض العادي
