يقول المثل الخيل عزٍ للرجال وهيبه ,
وتقول هذه المقطوعه الشعرية
بالخيل عزٍ و للرجاجيل هيبه
ياصاحبـي دنيـاك هـذا عجيبـه=تغيّـر احداثـه لجيـلٍ بعـد جيـل
واشهر مثل عند العـرب نبتديبـه=وعلى المثل نبني معانـي وتأويـل
(بالخيل عز وللرجاجيل وهيبـة)1*=شطرٍ يقولونه هل الخيـل والهيـل
وهذا بمـاض الوقـت ماينحكيبـه=ايّام دور السيف والرمـح والخيـل
يـوم ان كـلٍ يعتبيهـا لحريـبـه=يازين فوق الخيل صوت الهلاهيـل
واليوم صارت هيبة الرجـل جيبـه=المـال يصنـع هيبـةٍ للرجاجيـل
ومن زاد ماله صار كـلٍ صحيبـه=يسمع صدى صيته بعـزٍ وتبجيـل
والمـال للرجّـال ماهـو معيـبـه=ورجلٍ بلى مالٍ قليـل المحاصيـل
وقصرت يدك عمـا تريـده غليبـه=مثل الذي يبرك لحملـه ولايشيـل
اغنم شبابـك قبـل حـزة مشيبـه=واحرص على العليا ولو تسهر الليل
وعمرٍ بليـا نعـم ويـش ينبغيبـه=أكثر عمار الناس مثل غثا السيـل
لاصـار ماعلـم المراجـل تجيبـه=(ماكنك الا من حسـاب المعاميـل)
(الطيب سندا والمراجل صعيبه)2*=قبلي يقولونه صعـول الرجاجيـل
ولاتامـن الدنيـا بعلمـه وغيبـه=احسب حساب ايّامه اللـي مقابيـل
تضحك بناب وناب يحمل مصيبـه=فيهـا مسـرّاتٍ وفيهـا غرابـيـل
واحذرك بعض النـاس لاتقتديبـه=اللي مناهجهم على القـال والقيـل
وابعِد عن اللي يلحقك منـه ريبـه=ابعَد من الجدي الشمالي عن سهيل
وان شفت بالمجلس نميمه وغيبـه=احفض لسانك عن كثيـر الأقاويـل
ورفيقك الداني ليـا شفـت عيبـه=كبر الجبل . خلك مثل مظلم الليـل
وفي محنتـه خلـك دواه وطبيبـه=ما بالرفاقة يافتـى الجـود تبديـل
وصلواعلى اللـي سنتـه نهتديبـه=اللي هُزم في مولده صاحب الفيـل
سطم فهد الخليل
*1هذا الشطر قديم ولا اعرف قائله
*2 هذا الشطر للشاعر عمعوم الرويلي
الخيل عز للرجــال وهيبة
العرض العادي
