معلقة الشاعر منصور بن سعدي الرمالي الشمري
طنايا الذل ما ننزل جواره = وعلى أنفسنا المذله ما رضينا
طنايا وإن نخانا كل مبلي = توشحنا الهنادي وإنتخينا
طنايا للمعالي فوق نرقا = سنام المرجله فوقه رقينا
طنايا وإن نطحنا كل غازي = يتراعد خوف من يقبل علينا
طنايا وإن نصانا كل ضايم = يشوف العز من ساعة يجينا
طنايا يوم رماح الكون تخطي = تصيب رماحنا من به رمينا
طنايا حنا سلاطين الجزيرة = حكمناها في ماضي السنينا
طنايا من الزمن قرن حكموها = وأضف عشرين معها حاكمينا
تسيدنا وسدنا بالقبايل = قبايل نجد كله له ودينا
وتسلطنا بحد السيف الأبتر = أزحنا من تولاه وولينا
كتبنا إسم الطنايا فوق عرشه = وإسم من كان يحكمها محينا
وفتحنا في سجل الحكم صفحه = وصفحة من حكم فيها طوينا
وأخذنا بثأر من صوت لشمر = بدل هذلول شيخين رمينا
مشى هايس لعيون هيفاء = تنخوى وإنتخى ذرب اليمينا
وفعل فعل رفع روس الطنايا = وعلى فعله خصومه شاهدينا
ونوانا إبن هندي بحايل = وحنا من نوانا له نوينا
تحركنا ونزلنا له بعروى = قصرنا عنوة الشيخ وعنينا
وتقابلنا الصبح والشمس حيه = خسر فيها وحنا الرابحينا
وحاصرنا الكويت شهورٍ أربع = وثلاث قلاع بالجهراء بنينا
ولاذو في حمى الإنجليز عنا = وفعلنا المعجزات ولا إنثنينا
ونخانا إبن ثاني وأجبنا = كما العاده ليا إنخينا مشينا
وصلنا لدار إبن ثاني وأغرنا = على جمع الغزات الطامعينا
وهزمنا جمعهم والكل يشهد = وشواهد ما ذكرت القلعتينا
وغزينا الجوف يوم الروله زادوا = وهدمنا دونهم الحصن الحصينا
حصدناهم وأبدناهم إباده = هزمناهم وأخذنا البيرقينا
علينا يبغون الزود لكن !! = تطيح الروس ما تعلى علينا
وهزمنا مطير بأم الجماجم = بها زدنا عليهم وإعتلينا
هزمناهم بها أكبر هزيمه = وما سلم منهم إلا الهاربينا
وغزانا الشريف محمد بحايل = وحنا إليا ثبتنا ما إنتحينا
تقابلنا وصار الصبح ظلما = يشيب منها راس الجنينا
صمدنا بوجهه تسعين ليله = سناعيس لضدها ما تلينا
بذاك اليوم سمينا الطنايا = طنايا ما نهاب إليا طنينا
وجت زوبع وطير العز غنّا = أناشيد النصر للصامدينا
وغزينا المنتفق بأطراف دجله = وهزمنا جمع خزعل وإرتكينا
وهزمنا اللي مع إبن صباح يحامي = وعن الفزعات ياما له نهينا
دفع قيمة غروره نص جيشه = جزاء للكبر وإستهزاه فينا
وتحت رايتنا تمشي قبايل = ومن يعصي على داره مشينا
وترى شمر تميزهم ثلاثه = بها عن غيرنا متميزينا
صخانا الحاتمي من دور حاتم = أضف معها الشجاعه ثم دينا
ورثنا الجود من أبونا حاتم = بنا الأمثال تضرب كل حينا
وسكنّا بحايل قبل النبوه = وبعد النبوه له حمينا
وبأراضي نجد قد رفرف علمنا = ومن البصره إليا حد الرافدينا
وحنا هل الأخوه والمروه = وإذا ضاقت على المبلي يجينا
وحنا هل الرياده والسياده = لنا تخضع رقاب العالمينا
حقايق لو تثبتها وثايق = لها التاريخ يخضع ويبينا
لنا التاريخ يشهد بالحقايق = مع أهل العرف فيهم شاهدينا