ياليتني في عالية نجد سجِّيت=في ديرةٍ بين الجحادر وبرقا
غربٍ من الزيدي بذيك السباريت=ومن جفرة الصاقب على الوصف شرقا
مادوجوا فيها عصير الكواشيت=ولا حرِّقوا باق النفايات حرقا
يدله بها اللي في ضميره تناهيت=من غاية الوجدان مدروق درقا
ينساح بالي كل ماشفت واوحيت=معزوفةْ الجندب على صوت ورقا
ياما مشيت ابها وياما تحليت=اضعان بدوٍ تيهوا كل طرقا
بدوٍ لهم صولات في نجد يابخيت=ويفرِّقون مولع الحب فرقا
انا اشهد اني في مناهلهم اشفيت=يسرق غلاهم مهجة الروح سرقا
عيد بجاد بن شده العتيبي
وهذي المجاراه من /
وصل الله بن عجلان العالي
يا عيد سج وسج بي معك لانْويت=وانعش قلوبٍ في هوا البدو غرقا
امشي معك ياللي بشفك تمشيت=واخيل من نو الحيا كل برقا
عدِّيت في راس الطويلة وعدِّيت =ترقا على روس النوايف وانا ارقا
وقمت أتمنى مثل مانته تمنيت=هاضت شجوني وأطرق الباب طرقا
احضر هجوسي وانحت من الصخر بيت =ولا اهاب صعب الدرب لو هو معرقا
ذكرتني مدهال ربعٍ لهم صيت=رماحها تزرق بها الخصم زرقا
واليوم باقي حيهم يتبع الميت =ما بينهم في موقف العز فرقا
عز الله اني من جفاهم تجافيت=وبيض الورق من دمعة الحبر زرقا
وصل الله بن عجلان العالي