هذه القصيده الرثائيه قاله الشاعر الدكتور / شائم الهمزاني الجذيلي الاسلمي الشمري في
الشيخ / راكان الاحمد التمياط (( رحمه الله واسكنه فسيح جناته ))
يا كبرها : مصيبة بلدنا وبلـــــــواه = ويا كثر والله في زمننا دواهيــــه
اليوم ؛ من (عمَّــــان) علمٍ سمعناه = أوجع (جبل شمر) وزلزل رواسيه
قالوا لنا: (راكـــــان) شيخٍ فقدناه = ولا هو ؛ مجرَّد شيخ حنا نسمِّيــــه
جضيت ؛ قلت : الموت معقول وافاه؟! =(راكاننا) ! ليه المنية توافيه؟
لكن ؛ قريت اليوم ما كان نخشاه!= صدق الخبر بعض الجرايد لفت فيه
وبدأ يهل الدمع مع إني أقراه= وعليه ؛ سال الدمع من عين قاريه
يا ما ويا ما هلَّت العين من مــاه = بالدمع الأزرق لين جفت مناشيه
مع غصِّتٍ ما يوم بالعمر ذقنـاه = كن (اللحام) بداخل القلب يشويــــه
يا كم خبر مثله كثيــرٍ قرينــاه ؟= ما هزنا مثله وأنا عارفٍ ليــــه؟!
ما هو لأنــه عـن فقيــدٍ فقدنـــاه!= ولا هو لأنه شيخ حاضر وماضيه!
ولا هو بكونه (شمريٍّ) عرفناه= وإلا بكثر النوح راجين نحييه
لا لا ورب البيت والله والله= لكنه الفقيد (وجه الفَلَح) فيه !
الفالح ؛ اللي بالمواجيب نلقاه= طلق الحجاج ودلته حد حاميه
فنجالها للنفس غايه ومشهاه=من شف رايقها تفتَّح مشاهيه
ولين النهاية ما أختلف يوم مبداه = في نهجه الواضح من أول مباديه
و(حمية الأسلم) بصدق المحامات= من خلقة (أبو زيد) غريزةٍ فيه
و(راكان) بدرٍ غاب في عز قمراه = يومه لنا طاب السمر في قماريه
ما أحلاه لا لاحت من الشرق بشراه = وحنا بظلمتنا نتحرى حراويه
يا ما نسينا الهم في حلو مسراه = ويا ما هدتنا للموارد مساريه
عقب الظمأ لزلالي العذب نرواه= ينباج لنا الدرب في مهمه التيه
بالنور ؛ يرعانا وبالعين نرعاه = ويا سعدنا لحظات كنَّا نراعيه
سلالة (التمياط) عند المباهاه= يا حسرتي ؛ ما كل شيخٍ يماريه
يا قالوا : (الصايح) وقفنا و(صِحْناه) = و(مشل: أبو شمر) حفيده يْحاليه
حر ولد حر بوافي مزاياه = من ماكرٍ يذراه بالجود ذاريه
عزيزهم ؛ بالله عزيزٍ ؛ وعزاه= يا عًـزتي ؛ لعيون والله معاديه
و(العز) في (راكان) مهما رثيناه = ما عاد باقي غير رجوى العزاء فيه
ولنا العزاء في كل ساعي بمسعاه = واللي مثل (راكان) (راكان ندْعيه)
على بياض الوجه في وجه بيضاه= طبع الأمل نضل بالعمر نرجيه
لا (الناعي) اللي في ثرى المســك واراه= ولا الشاعر اللي بأصدق إحساس يرثيه
ولا (النايحات) الصوت ؛ ويلاه ويلاه = ولا كل من ينعاه و(الكل ناعيــــه)
ولا (الراجي) اللي جض من لوع فرقاه= يوم انقطع حبل الرجاء في مساعيه
ولا (البائس) اللي بالخبر فاغـــــرٍ فـــاه = عظ الإبهام بحسرته يابسٍ فيــــه
ولا (الخاســـر) آمالـــه بما هو تمنـــاه= أللي فقــــد أول وتالـــي أمانيــه
ولا (العاني) اللـي قاصــدٍ باب مبنـــاه= اللي بوقفاته كبارٍ هقاويـــه
ولا (الناخي) اللي قال : من عاد ننـخاه؟! = ونقول: (تكفا) في جزيل المشاريه
ولا (الصاحب) اللي طيلة العمر خاواه= ويقول : ليتي ميْت والله مْخَــلـِّيه
بعد (أبو زيد) العمر وش عاد يسْواه؟! = ما صافي بالود يمكن نْصافيه
ولا كل (من حَـبه) وبالروح يفــــــداه= زهد بعمره قال: شابــت لياليــــه
من بعد فقــــد (البيه) ما له بدنيـــــاه= ولا له بكل الناس قاصي ودانيه
و(راكان) راح ؛ وكان في (زيــــد) مسعاه= و(سلمان) والي (زيد) من بعد (واليـه)
اللي ؛ مع الراحل وفاء لين (مثــــــــواه)= بأكرم قدومٍ مع سموه يجي فيه
و(سلمان) (معنى الحر): في (حر عيناه)= و(الحر) بالنوهات ما أحدٍ يْوصِّيـــــه
بأسمى مواساةٍ لنا إنسان واســــاه= وحنا ، بـ(راكان) الفقيدة نواسيــــــه
(الشهم) في (شمر) تجمَّل وحياه= (راع الجمايــــــل) ليت نقدر ونوفيـــه؟!
وسامي سمـوه : (درة التاج) تزهــــاه= ما هقوتي سواه في يوم تزهيه
(معنى الإمارة) فيه بالفعل جـــــاراه= الله !!! يا (سلمان) ما أسمى معانيـــه!
سلمان : كامل معنى الإنسان معناه= تأخذ منه أسمى المعاني وتعطيه
أميرنا : اللي وافياتٍ ســجايـــاه= ما عندنا بالناس واحدْ يســـاويـــــه
بالورد لوهي تفْـرش الأرض لخطاه= ولـو تذهب الأرواح لعيون عينيـه
ما هـــــي تساوي ذرةٍ من عطــــاياه= وغير (الدعاء بالخير) وش عاد نعطيـــه؟!
وجميعنـــا عبيد فضلــــه وحســـنـــاه= (الله) عنـــا بالحسانــــــي يجازيــــــه
عسى نصيبه في حياته وأخــــراه= من فضل ربه كل ما يهتني فيه
على المعزة والسعادة بدنياه= والموت: إلى جاه بحدينا يْخَليــــه
يسْعد حياة الناس في (سعْد عيناه)= ومريضهم بالله ودواه يشْـفيه
تجبر؛ عثرات الكريمين ؛ يمناه = وتدْمل ؛ جروح اللي : طبيبه بحل فيه
(وجه الفلح) كل السَّعد في محياه= مع شفة الفنجال ما بين أشافيه
في لفتةٍ من حامي الوجه والجاه = قبل صدور الأمر ما أراد يأتيه
فيه الإرادة : أمر والحزم يقفاه = وشمس البصيرة في (ضحى الفهم) توجيه
و(معنى الفراسة) فيه ؛ أو منْه مجْناه = بأكمل ؛ تعاريف الفراسة يْـلَـبـيه
و(المستحيل) إنا مدى الدهر ننســـــاه = واللي مثل (سلمان) ما أحدٍ بناسيــــه
بالله ، ياما راحت أرواح ؛ لولاه= ما صدْرٍ ؛ إلا فضل (سلمان) ماليه
لو غاب تبقى سالفتنـــا بطريــــاه = بأذواقنا (شهْدٍ بليمـون) طاريــــه
لنا أجمل اللحظات تأتـي بذكراه= ونقول: (ما شاء الله) عسى الله يبقيـــه
يا ربنا ؛ ندْعيك ؛ وكلٍ بدعواه = وبالله ؛ ما يخيب إنسان يدعيه
ترحم فقيدٍ حاتِم الأجل وافـــاه = والصبر والسلوان تمنح محبيه
وعساه ؛ في طيبا على طيب ملفاه= في مثل ما هو كان بيضٍ أياديه
وأجبر عزانا فيه في (وافي أبناه)= وتبقي لنا كريمٍ فضلٍ وفاء فيه
وجميعنا في عزة الذات ننصاه= وبالحب والهيبة تحياتْ نهْديـــه