بسم الله
الى قبر حاتم الطائي
أتجدد معكم في هذه الأبيات ارجوا قبلوها كما أوردها وعساها تنقال على استحسانكم وتصل الى رضا ذائقتكم
ياراكب(ن) حمراء من أطيب ركايبه=لون الشفق لا صارت الشمس غايبـه
فوقه شداد وثقـل مـن كـان راكبـه=حمراء على البيـداء تلاحـق هبايبـه
من دار جدّي نوفـل أصبـح مديدهـا=من واحة نخيلـه ومخضـر عسايبـه
من فيّة أم قلبـان يمّـة خشـوم أجـا=مدّت لدار(ن) يفتخر فـي نجايبـه(1)
منهاك يالحمراء فـي تـوارن الجبـل=ومناخك بجنب النبيـل ونصايبـه(2)
ذاك الكريم اللي رفع هامـت العـرب=وكـر النـدى كفّـه للأمجـاد جايبـه
ذكره وصل قيصر وكسرى وهكالعجم=وفعله مِثَلْ عند الفتـى وعنـد شايبـه
ويشهد له ابحب الخُلق مع مكارمـه=المصطفى المعصوم عن كـل رايبـه
جدّ(ن) لنا من صلب طـي وسلايلـه=وفي سيرته روح الحشـى دوم ذايبـه
حاتم ولا تنجب مـن امثالـه النسـاء=لو هن على أفضل طَبْع ربّ(ن) ربايبه
ذبّاح خيلـه لأجـل صبيـان جارتـه=يوم المجاعـة تعلـن أبشـع حرايبـه
ليته يقوم اليـوم مـن جلسـة القبـر=ويشوف وشلون الدنس فـي وجايبـه
غابت نقى الفطرة عن الجود والسخاء=واللي بقى منها غـدت تقـل غايبـه
صار الكرم يكرم بـه لقـاوي البشـر=وكل(ن) ورى الإكرام صوّب ضرايبه
والأ الضعيف اللي برى حالـه الفقـر=داره من القلّ اعصفـت بـه نوايبـه
يصرخ بوجهه جوع وملاذه الجزع=عزّي لحاله ما لقـى اكفـوف طايبـه
ياويسي اترابه مُنـى مـدرك الغـرق=لا بارت الحيلة وضاقت رحايبـه(3)
وليته يقوم اليـوم مـن جلسـة القبـر=و يعطي كرام الوقت شي من وهايبـه
يِنْور لحاضر هالزمن عتمـة الدجـى=و ظلمات طيب وبيض أفاعيل خايبـه
ويردّ ماء الأفعـال مـن بَعْـد جفّتـه=ويسقي محيل أرضه وتزهر عشايبـه
وســلامت من رد وقرأ وشاهد
أخوكم
القفيعي
جليس الدار
تفسيرات لسد ثغر التساؤلات:
(1) أم القلبان: من قرى شمال مدينة حائل التاريخية ويرجع تاريخها الى أكثر من 300 عام.
(2) توارن: من قرى شمال غرب حائل وتحتضنها جبال أجا وهي القرية التي يوجد بها أطلال وأملاك وقبر حاتم الطائي.
(3) ياويسي: كلمة مشهور في لهجة شمر ويردافها كلمة : حسرة/ عزّي وهي لفظة تقال من باب الشفقة والعطف والرحمة وأصل الكلمة هي أسم صنم لقبيلة طي العربية كان يعبد أيام الجاهلية وهو منحوت في الجبال ومازال موجود الى أن قامت أمانة حائل في عام 1424 بوضع أكباس أنارة على جزء من سلسة جبال أجا واتضح شكل الصنم وأمر أمير المنطقة بتحطيم الصنم خوفا من البدعة والتقديس من قبل الأجانب في المنطقةوتم تحطيمه.
منهاك / ومناخك تنطق بلهجة شمر لتصبح منهاتس / ومناختس فتتضح المخاطبة للمؤنث بعكس ماهي مكتوبه.
وتقبلوا شكري