السلام عليكم
بعد التحيه
يابنت ياللي في كفوفك نقاريش= بالله كلمه يالغضي تبري الجاش
قالت ودون مواخذه بس معليش = انا اصيله وانت مدري من اياش
حتيش لو الشعر مغويك حتيش= مدري عريب الجد والا على ماش
قلت اشربي من علم يروي المعاطيش= لاوالله الا جيت اوردلها كاش
ربعي ليامن قابل الجيش للجيش= كم عجتن في ساحة الموت تعتاش
وربعي ليامن طوحن اللواليش= يردون حوض الموت عجلين وعطاش
ربعي وربعي مرويين المرابيش= وكم واحدن من ذارف الدم طشاش
يوم الردي جنبه على مسند الريش= مكسب غنايمهم على روس الانماش
يالعنبوو دارك لياقلت ياغويش = خطلان الايدي يوم يقصر بها اللاش
ربعي الطنايا كالسباع النواهيش= ياما حكمناها من الطاش للطاش
حنا عيال الطيش في ساعة الطيش = زهيد بعنا الروح للمجد ببلاش
نتعب عدانا يوم شيل النواعيش= وكم شيخ قوم لياطعناه ماعاش
شمر ليا هاج البحر مالهم قيش= لهم ملابيس الفخر تاج وقماش
ريف الركايب بالمسا والمغابيش= والضيف له بعيوننا لحاف وفراش
وان شح بيدين الملا لقمة العيش= ضيفننا تقلط على حيل وكباش
نفرح ليا شفنا زوال المطاريش= والشمري من شوفة الضيف يهتاش
جتك العلوم الصامله دون تشويش= تاريخهم يابنت مثل ابيض الشاش
نقشت حرف المدح بالشعر تنقيش= تقل عقود اللول بيدين طواش
وان كان عندك شك يابو عكاريش = انشد.. وتلقا العلم مع كل مطراش