نبذه عن الفارس هذلول الشويهري...

هذلول الشويهري وعلاقته مع هايس القعيط
هذلول بن فرج بن مطلق الجمعان و (جمعان ) هذا أبو فخذ القلابا من السويد من سنجاره وخاله هديب ابن صبيح الهر بيد من السويد لقد ذهب بعض السويد في الزمان السابق إلى العراق وراء الكلأ ومن ضمنهم فرج أبو هذلول ومعه ابنه هذلول شباب عمره بحدود ( 16 ) سنه وجاوروا هايس القعيط من البريك من زوبع في العراق وهايس ولد فارس في ذاك الوقت وقام هذلول يذهب مع هايس إلى الصيد وعرف هايس إن هذلول يبي يطلع فارس تظهر عليه عالمات الفروسية وأحبه وأخذ يدربه على الفروسية أخذوا السويد لهم وقت من الزمن ما أنا عارف كم جلسوا هناك وحنوا إلى ديارهم منطقه حائل وأخذوا يستعدون للرحيل وطلب هايس من فرج قال ابنك هذلول ما هو بسيط يبي يطلع فارس إذا انتم ملزمين على الرحيل خل هذلول عندي أبي أدربه على الفروسية اعتذر فرج قال مقدر أخليه بالعراق شاب صغير وحنا نبي نذهب إلى نجد لو المسافة قريبه لا وافقتك الرأي مار بيننا ما يبيد السمين رجعوا السويد إلى نجد حسب مارواه الراوي الكبير( حمود العمران ) واخذ هذلول يتدرب على الحيافه هذا بعير يأخذه هذا رجال يأخذ سلاحه وأحيانا يأخذ أخوه مزيد معه في الحيافه احد المرات قابلوا ثلاثة رجال حنشل مثلهم فتلاقى هذلول مع اثنان ومزيد مع واحد لابس ( عباه ) بمعنى مشلح أخذ هذلول يتبارز مع إلي قابلوه لما أخذ إلي معهم وفرغ ونظر إلى أخيه يمار صاحب المشلح طارح أخوه أخذ الخنجر وضرب صاحب المشلح أثريه أخوه اخذ بشت الرجال ولبسه وأخذ يخلع الباقي من ملابسه لما التفت عليه يمار هذا أخوه مزيد وشاله على ظهره حتى وصله إلى أهله ومنهن مره راح ومعه بنيه بن محارب من السند وحافوا عرب من العنوز في احد الجبال مادري عرنان أو حلوان وعجزوا ليقربون إلى العرب وهم في وقت شتاء وذبحهم الجوع والبرد قالوا ماحاصل لنا فود مار نبي نضيف أحد البيوت غدي يحصل لنا طعام جوا صاحب البيت في الليل وجلسوا عنده وشب النار ولما ولعت النار وشاف هذلول صاحب البيت عرفه وهو يطلع قدام البيت وهو يصيح إلى جيرانه وينكم ياطلابه هذلول لأنه دايم ينهب منهم حلال وهو يأخذ هذلول التمر في محثله وخويه مادري وهم يهربون إلى الجبل يقولون هذلول سبيق ما يلحق وبنيه ثقيل ويمسك يده ويشله لما زبنوا الجبل العنوز شبوا الشعلة مع أثر هذلول وخويه حتى وصلوا الجبل ورجعوا قال بنيه الله لا يبارك فيك معزب مخلانا نأكل من هالتمر ذبحنا الجوع قال هذلول ابشر في التمر وهذا أخذته معي وهم يأكلونه وينحاشون تحت ظلام الليل ويواصلون مسيرهم وحنشلون على قبيلة بني رشيد ويطلعون على لهم راعي ابل وقت العصر ويختفون بلهم غار حتى أغربت الشمس يمار اكالذلول الشقراء في رقبتها له سلبه بمعنى قلادة قال هذلول لصديقه بنيه اذهب إلى المكان الفلاني وأنا أبي أحاول امسك هالذلول إن مسكته ركبته ولحقتك وان ما مسكته اجيك بالموقع المتفق عليه راح بنيه وقام هذلول يبي يحاول يمسك الذلول يقول يوم شاقتن وهي تنطحن ويمسكها بسهوله ويركبها ويلحلق خويه وتصير ذلوله المشهورة ( ريمه ) ذلول أصيل تلحق الخيل ويتبرك فيها يقولون سبحان الله العظيم من يوم كسب ريمه انفتح عليه باب الرزق حسب رواية ( سعدي الشويهري ) رحمه الله لما شاف بنيه فعل هذلول قال وهم مع الطريق طلبتك ياهذلول قال عطيتك قال أبي بنتك غلول وهي طفله صغيره غدي يجيني ولد ٍ مثلك قال تطلبن الوغد اللي يرضع أمه قال بس عطني أبيها قال ترها لك إذا كبرت وأنت حي وأخذها بنيه بن محارب عقب وفاه هذلول جوزوه عمام البنت مادري أخواله

 

 

 

 

 

 

 

 

 

 

مغزى هذلول على اللحاوي
أشتهر هذلول في ذاك الوقت وذاع صيته بين القبائل في وقت كان أكثر البادية من قبيلة شمر هاجرت إلى العراق ما بقى من شيوخ شمر البادية المعروفين في ذلك الوقت إلا عدوان ابن طواله مسلط التمياط والحضر العلي حكام حائل تابعين لحكم السعود أخذ يغزي أحيانا على عنزة وحياناً على الشرارات وحياناً على قبائل أخري ومن كثر ما يغزي أبل عنزة قال عقاب شيخ الجعافرة من ولد سليمان مقولته الشهيرة ( هذا إن طول الله في حياته باكر يخلينا نشرب الماء ) يعني يأخذ حلالنا ويفقرنا ونذر عقاب على نفسه نذر إذا مسك هذلول الشويهري ليذبح جزور وفاء بالنذر ويذبحه في منحر الناقة وهو يغزي هذلول له مغزى يم الشرارات ومعه ( 40) من جماعته السويد مع بدايه الصيف ويطلع من عند المسمى الجبل الكبير اللي يحد ديار السويد من غرب ويرد على عين كحله في جبل عرنان في ديار قبيلة عنزة وهو في طريقه إلى المشاش وكديار (كيف علم العواجي بمغزى هذلول ) فيه عده روايات يقولون فيه رجل من جماعه عقاب جالس في رأس احد جبال عرنان ويشوف هذلول وجماعته يوم يردون كحله ويصدرون منها ولما رجع الى جماعته قال أنا شفت أهل ركايب طلعوا من المسمى وردوا كحله وصدروا شمال قالوا كم عددهم قال من (30) إلى (40 ) قالوا أكيد الشويهري وقالوا مسكوا العين أكيد يرجع مع طريقه ويرد العين وبعض الرواة يقولون شاف أثرهم وفيه رواية ثالثه أنهم قابلوا لهم صلبي يتصيد الغزلان في العين تبع قبيله العواجي لما رجع إلى العرب علمهم :: المهم مشوا ولما وصلوا غزوا هذلول بئر ماء يسمى بيط شرق المشاش إلا هولا الشرارات نزيل على الماء بزعامة الفارس / سليم أللحاوي ومطلقين الزمل في الفلاة والإبل ما بعد وصلت مع الطريق والعرب شافوا ألغزوا قال هذلول وش تبوننا نعمل يعني جماعته قالوا الرأي رأيك قال حنا مظمين والعرب انتبهوا لنا ولأبه فائدة إذا حنا مضمين والعرب فزعوا مع أثرنا ولكن نبي نغير على الزمل ونهج فيه إن قدرنا نأخذه زين على زين وان مقدرنا يتشفقون زملهم وننجوا حنا وركابنا وهم ينفذون ألخطه وأول ما لحقهم سليم الحاوي على فرسه الكبيشا أصل فرس عند الحاوية ويقوم حسين الذنيب بواردي وهو يضرب فرس سليم يمار طايحه وجماعه سليم يركضون على أرجلهم البل ما وصلت والزمل خذوه الغزو ويركب سليم بنت الفرس ويلحقهم مره ثانيه قال حسين الذنيب يا سليم قال نعم قال المرة الأولى ضربت الفرس شحيت في عمرك أبيك عز لشراريات والمرة ألثانيه والله إن مارجعت والله لأحطه في راسك قال سليم تستأهلون ياصبيان شمر والله ثم والله إن مقطهاغادي لاتقولون جانا سليم ولاهاش والله لو فتيلها فيها إنكم ماتروحون وشعلان معكم ( الجمل الأصيل ) قال معيوف بن محارب راعي ( شعيله ) ( ارجع وراك يا سليم لايذبحك بواردينا اللي حافظ لك مقطه ) قال حسين في هذه المناسبة





الاولــه يــوم النـضـا مقفـيـاتـي.........عشيتهـم مـن قايـدات الجميلـة
والثانيـة يـوم النـضـا مقبـلاتـي...........ريحت حشاش الكبيشا الطويله
لحقت ترثع به سوات المهاتـي...........شمام ٍ ليا أنا مشرعه بالفتيلـه
واحلو نزوتها وهـن مقرشاتـي..........ياكاسيـه مـثـل الهمالـيـل ذيـلـه
سليم دوك المرشحه والحذاتـي.........تخلف الله عقب ركـب الاصيلـه
يااختفن العيرات كثـروا نخاتـي..........في ساعه علـى المحـول ثقيلـه
لعيون من خده يشادي المراتي............اللـي الــى حــد المـبـرم فليـلـه

قال هذلول ( كفو والله والف نعم ياحسين تقول وتفعل)

 

 

 

 

 

 

 

 

 

 

كون كحله
رجعوا غزوا هذلول من اللحاويه وهم مظمين والماء قاضي معهم ولا لهم إلا يردون على عين كحله في طريقهم يشربون منها ويوم جاء اليوم الثاني ويرسلون سبع رجال من أخوياهم يردون (يسمونهم الموردة ) لعين كحله قالوا شوفوا العين هو عليه احد وشربوا واسقوا ركابكم وملوا القرب ونطحونا ليذبحنا العطش أثري الشخص الذي شاف جماعه هذلول يوم يردون كحله بالذهاب علم عقاب العواجي وأرسل عقاب جيش كثير العدد بقياده فهيد ومحمد عيال عم عقاب وقال عقاب إذا جت حروه هذلول أو شفتوه أرسلوا لي وأنا أجي وفي رواية ثانيه يقولون أن أللحاوي أرسل راعي ذلول إلى العواجي وأخبره باللي صار ولكن الرواية الأولى ارجح وصلوا الموردة إلى عين كحله يمار مايشوفون أحد أثري الجيش متوزي يمين الطريق وشماله مختفي في التلاع دخلوا الموردة إلى العين يوم سكر الجيش مدخل التلعه وهم يمسكونهم ويربونهم ويأتون بهم إلى القايد فهيد وهو جالس والقهوجي يصلح القهوة قال نبيكم تعلموننا بالصدق : وش أنتم ؟ قالوا حنا مورده العقيد الشويهري قال الشويهري وينه ؟ قالوا وهذا مع أثرنا ما له طريق إلا على كحله والسبب أنهم مظمين والقرب يابسة والذلول تحن من العطش ولأفيه موارد غير كحله قال متى حروتهم ؟ قالوا حروتهم مع العصر قال العواجي وش كثرهم ؟ قالوا ثلاثة وثلاثين تمام الأربعين بنا حنا الموردة قال وش معكم من الفود ؟ قالوا زمل الشرارات قال معكم شعلان ؟ جمل أللحاوي الأصيل قالوا معنا قال زين استعطوا انتم اللي له أخو واللي له ولد عم أنتم نبشركم سالمين وكل واحد يطلب واجد من ألغزوا اللي بالطريق نعطيه إياه والباقين نبي نذبحهم أحد الموردة أسمه عمر العميم أنا أخوتي أثنين قالوا اختر واحد والثاني نبي نذبحه وش اسمهم قال واحد اسمه دباس والثاني اسمه ركاد قالوا يهم أطيب قال دباس أطيب قالوا وأنت تبي أيهم قال أبي ركاد قالوا ورآك تطلب ألردي وتخلي الطيب قال دباس له ولد وركاد ماله عقب وهم يستعطون ستة ويبقى السابع ما ستعطى اسمه رحيل ابن ضاحي من العممه جثه قالوا ورآك ماتستعطي ياكبير الزول قال مالي قريب من هالغزوا وكلهم بعدهم واحد وأخاف اطلب واحد يزعلون الثانين قال فهيد صبوا القهوة يوم صب القهوجي الفنجال قال فهيد هذا فنجال هذلول الشويهري من يشربه يقصد جماعته اللي يشربه له خمس ركاب يختارهن على عينه وإلا جمل أللحاوي شعلان الأصيل المشهور ومن مدله الفنجال عيا عنه لما وصل واحد اسمه رجاء البوهي فارس مهو بسيط قال سق الفنجال جاي قال فهيد يارجاء قال نعم قال ( تر الدعوى ما هي بسيطة اللي يبي يقابلك هذلول الشويهري ) ( قال ازهله يبي يعين الله ) قال والنعم تستأهل وهم يصفقون له الحضور قال فهيد لحد أخوياه أرقب رأس المرقاب وإذا شفت هذلول وجماعته علمنا وأنتم يالجماعه اختفوا في هالتلاع ليشوفكم هذلول وربعه حتى يدخلون ونمسك الريع ويصيرون بيننا وبين الجبل وهم ينفذون خطه القايد هذلول لما وصل العصر ماجوا الموردة قال لأخوياه أكيد أخويانا مسكوا يوم مناطحونا قال حنا ذبحنا العطش علمنا بالماء أمس وقتنا صيف ولا حولنا موارد غير عين كحله وش رأيكم وش نسوى قالوا الرأي رأيك قال (( ياجماعه القوم لهم شريدة والعطش ماله شريدة )) يعني ماله بقيه ولكن ماحنا وأصلينهم إلا مع غروب الشمس وهم أكيد ماهم قايلين شئ لنا حتى ناصل الماء وعلى ماتجون العين طقوا رؤؤس الركاب ونزلوا بسرعة وكل واحد يأخذ ماء في قلصه وشربوا قبل يأتونكم القوم وزبنوا الجبل لعله يساعدكم على الهوش يوم أغربت الشمس يوم أنه شافهم الرقيب وهوياتي يبشر العواجي ابشر في هذلول قال العواجي ربطوا الموردة في حبل واثبتوا أطراف الحبل في أوتاد وخلوهم عند العفش وانتم اختفوا في التلعه ولا تعرضون لهم حتى ياصلون العين ولأوراهم مخرج يوم دخلوا غزوا هذلول التلعه يمار هذا أثر الموردة داخلين مع التلعه وليشوفونهم وهم ينوخون الركاب على العين يوم طلعت عليهم الجيوش من التلاع من يمين ومن شمال يمار لأتعد ولا تحصى وهم يسدون الريع قال (هذلول هولا عنزة هذا العواجي إن مسكنا والله مايخلي بنا رطب الحلق ) وأخويانا مربوطين عندهم مار كلٍ يغرف في قلصه من العين وخوذوا سلاحكم وازبنوا الجبل هذه قوم مالهم ملاقى قالوا (ركابنا) قال خلوا ركابكم الطمع في أرقابكم ازبنوا الجبل وهوشوا دون أعماركم إذا سلمتوا واجد الركاب وهم يرقون الجبل وهذلول يمشي خلفهم ويجلس واحد اسمه عوض ابن فراج من الخلوي قال اجيكم أبي أقرط عند حميراء لي رظمه أو رظمتين وجيكم يعني ذلوله قال هذلول اطلع مع أخوياك لاينذحون السويد السبب أنت قال ماخلي حميراء إلا أهوش عنده يوم التفت هذلول يمار ذلوله ريمه تعتب مع أثره ويطق حنكه الصفاء وتحن قال (أر أخو سمراء ياولاد صقر ياحق أبوي وجدي وش عذري عند ريمه! ريمه تنخاكم وين أولا صقر ؟ وين زوبع قالوا يا فرحتك يخو سمراء وهم يردون ويتناطحون هم والعنوز في حد الصفاء من السهل قال هذلول اجدعوا ملابسكم يبي يصير فها ماسك وهم يجدعون هدومهم ملطان مصاليخ ياهذا رجاء البوهي اللي شرب فنجال هذلول يا من عين هذلول يالغنمين قال حاضر وأنا اخو سمراء قال اللي يبي ريمه مايخليه ورآه وهي هذا عمله قال لا والله ما خليها خيال الرحمن وأنا اخو سمراء هذلول معه شلفاء قصيرة ورجاء معه رمح طويل وهم يقومون يستديرون على لهم رضمه كبيره والكل يبي يضرب الثاني والرضمه فيها شطب يوم وزن رجاء الشطب في الرضمه يمار يبي يزرق الرمح مع الشطب ليضرب هذلول قال هذلول أر أخو سمراء جليني ضب تخشني مع الشطب وهو يضرب هذلول البوهي مع الإبط يمار فأج أبطه وهو ينقز عليه هذلول ويضربه مره ثانيه ويأخذ رمحه يمار واصله فهيد العواجي يامولم حسين الذنيب البارود وهو يضرب فهيد يمار طايح يوم طاح يمار محمد العواجي واصل يمولم عبدا لله السعدون البارود وهو يضرب محمد يمار فأج جنبه وهو يرجع ناطح ربعه يصيح والدم يكب وهو يتلاقى احد السويد جسمه صغير مع احد العنوز والعنزي جثه وهو يشيله العنزي على ظهره وهو يهرب فيه يبي يبعد ويذبحه قال حسين ارفع نفسك على اكتو فه يوم رفع نفسه وهو يضربه حسين مع مدق الظهر يمار طايح وهو يقوم السويدي وهو يذكيه وهي تنكسر قوم العواجي وترتكب الفرار وهي تزين ويزينه الله بالنسبة لولاد صقر قال رحيل بن ضاحي العميم احد الموردة المربوطين عند عفش العنوز أبشركم ربعنا انتصروا قالو وش أدراك قال هذا صوت هذلول قرب لنا يزير كالأسد قال انتم يالسته شدوا الحبل إلى جهة وأنا أشده إلى جهة أخرى وهذا يدل على نشاطه وهم يشدون الحبل وينقطع وهم يفزعون إلى ربعهم ويكسبون كثير من ركاب العنوز ويسألهم هذلول وش صار لهم في النهار وقاموا يقصون لهم اللي حدث معهم بالتفصيل قال هذلول تفقدوا أخوياكم ويفقدون خوي بن فطيمان بن قهموز من القدور ويرجعون للمعارة ويلقونه صويب وما ت بنفس الليله والباقين سالمين قال هذلول نبي نمرح واليا أصبحنا نبي نتعرف على القتلى غدينا نلقى العقيد ولبوهي معهم يوم أصبحوا ياهذا فهيد العواجي صويب وهو حي وهذا محمد العواجي وهذا رجاء البوهي والقتلى يقولون الرواة حوالي ( 25 ) تقريباً والله اعلم وهم يرجمونهم راجمين قال هذلول يا فهيد قال نعم قال ( الرجال كل يوم تصير بيدي الرجال وأنت الله حطك اليوم بيدينا وحنا نبي نتجمل فيك والخيار إلله ثم لك أنت تبي معنا إلى أهلنا وان الله أحياك وجهك على هلك وان مت وجهك على الله وإلا تبي نزلك عند أقرب بيت عنزي )قال فهيد يوم إنكم عملتوا فيني هكذا منتم متجملين فيني والجعافرة ماهم مخلينني يبون يجوني هنا ويأخذون حقي قال واحد من ألغزوا هالحين نبي نتجمل بك وأنت توعدنا بالجعافرة وأنت على حفره الموت وهو يضربه بالسيف يمار قاطع رأسه قال دونك ياضبعه الخشيم تجملي فيه وهم يأخذون ركاب العنوز مع زمل الشرارات ويشربون من عين كحله ويسقون حلالهم ويتنومسون ويقصد حسين الذنيب بهذه المناسبه

[[/size][/color]

يالله ياللي فوق خلقك ضمينا = عليم ما يخفى على الله خافي
نلوذ بك وأنت الذي تحتمينا = يا منطي الجزلات والرزق وافي
جانا العواجي فوق كور ألهجينا = من الزود ما جنب طريق المهافي
ركض بهم ولد العواجي علينا = وكل يقض من الجعد كل ضافي
باكو ارهن يا شيخ لتبتلينا = وش عذرنا عند قاطعات الفيافي
يا ما على ركن الركايب حدينا = وضرب بعيدان القنا وانعجافي
يثور من تفاقهم كلحنينا = ويثور من تفاقنا ملح صافي
ومطارق يقذفن مثل الشنينا = يا ما وقع بخشومهن من سنافي
وحامن طيور مدبحات علينا = من بيننا يرجن غصيب ألعلافي
دونك رجا في ملعب الغانمينا = عقب الوجب تذرى عليه السوافي
هذا جزاء اللي من شمام ٍيجينا = يبي الجمل وإلا الركايب جزافي
ومحمد يسري الحمر من يمينا = أستفرعه ستر البنات ألعفافي
وفهيد وقع بالجر يذاهبينا = مأخوذ يا ركب ٍتروح خفافي
يا ما رجمناهم بحد البطينا = بمشنشلات ٍمع سيوف رهافي
هذي من الله عاده ٍ يا بلينا = نجدع لحثات البراثن علافي
وأبو غلول ٍ شوق موض ألجبينا = ضربه لهم نطح ما هومن خلافي
ليا نتخى هذلول ثم انتخينا = لعيون ربع ٍ قرنوا بالكتافي
ملطان ما تلقى المشالح علينا = قنافه ٍ يالابسين الكفافي
نفلت أنا سمران ربعي علينا = وخطو أشقح الصبيان جاوه الهرافي
وركابنا ما فوقهن الذهينا = وعقيدنا ما ينطي الخيل قافي
اركض بنا يابو غلول ٍ رصينا = نجعل عمار ٍ طايلات ٍ قصافي

 

 

 

 

 

 

 

 

 

 

مغزى ذبحه هذلول
يقولون الرواه صارت سنه جدب ومحل على ديار السويد وراحوا السويد إلى الربيع شرق حائل وهذلول بقى معه قله قليله من السويد وهو يغزي بهم على عادته في بداية الصيف ولأهم معه الباورديه مثل حسين الذنيب وعبد الله ابن سعدون وكذلك ذلوله ريمه تعتبر من الخويا الطيبين وهم يغيرون على أبل عنزة في القلبان موقع يسمى قلبان ألكواكبه في ديار عنزة ويأخذ الإبل من المفلا ويرجع كاسب البل يوم راعوا أهل الجو يمار هولا الرعاة جايين يصيحون قالوا الشويهري أخذ أبلنا وهم يرسلون مراسيل يفزعون لكل عنزة اللي في ديارهم قالوا نبي مع أثر هذلول والناس الباقية خلوهم يلقفون لهم من عند جبل حبران ويصيرون قدامه جماعه هذلول يوم وردوا قليب العويد في شمال المسمى من شرق وقت الصباح يمار مندفن وقاموا يحفرونه حتى الظهر وقاموا يسقون ولأخلصوا إلا مع غروب الشمس احد خويا هذلول قال شفت لي زول لاج في عيني من عند ثليثوات قبل غروب الشمس أكيد أننا متابعين أرسلوا لهم واحد يرقب قال ماشت شئ أثريهم الفزعة اللي بثر البل وشافوا جماعه هذلول ورجعوا عانقوا الفزعة الذي معهم عقاب العواجي وقالوا هذلول وهذا يسقي على العويد قال أكيد يبي يمرح قريب ما هو مبعد صدر هذلول من العويد وعشا في حزم الجش يبي يمرح وهو تقابل هذلول وطويرب ابن بطاح عقيد سويدي اللي يقول به الشاعر الكبير رشيد ابن طوعان
يأهل البكار الحيل وطويرب ٍ مات ++ مير ألقحوهن وأودعوهن عشاير
كم ليله ٍ بأرض الخلا فوقهن بات ++ يودع على ذود المعادي جراير
( فيه روايتين ) الأولى إنهم تقابلوا طويرب غازاي يدور الفود وهذلول كاسب وراجع وهم يعشون جميع وأن هذلول قال ياطويرب إما لو هالربع اللي معي كلهم جماعتي الخاصين السويد والله إني لاخشركم في البل تكفينا حنا وإياكم البل كثيرة لكن أخاف يقولون جار علينا وعطا كسبنا عيال عمه قال طويرب الله يطول في عمرك يأبو غلول لا والله حنا غزوا لأهلنا وانتم غزوا لأهلكم بس أبي أشير عليك أنكم تسرون ولتصبحون في هذه الديار وعقاب يجدع النذور علينا أنا وياك قال ما نقدر حنا كل اليوم نحفر العويد ونسقي ولأخلصنا إلا مع المغرب وأخويانا تعبانين ما يقدرون يسرون قال شوري عليك أنك تسري يمكن هالزول اللي شيف العصر من العواجيه قال مانقدر يقول المثل القديم ( ليا منه نوخت ما ثارت ’ ويوم الكسر ما به نصر ) قال حنا نبي نسري ندور الفود ( والرواية الثانية ) نهم كلهم راجعين من المغزى وأن طويرب منكف وحث هذلول على المسرى ورفض هذلول قال أنا أبي امرح واللي يبي معي حياه الله واللي يبي يسري حافظه الله وان طويرب سرى ولا امرح إلا في جبل رخام والله اعلم : يوم أصبح هذلول وجماعته وهم يمشون معه حوالي 17 شخص تقريباَ العواجي حاط له ناس يراقبون تحركات هذلول قالوا هذا الشويهري مشى بالبل قال حطوا لكم خمس ركاب في هالا برق اللي قدامه أبرق يقع جنوب جبل حبران غرب حميصيص تروه يشوفهم ويحسبهم حنشل مرتزقة ويغير عليهم واليا غار عليكم اهربوا جهة ما هي جهتنا خلوة يطردكم وحنا نبي نعقبكم على البل وسمي هذا ألا برق من هاكاليوم إلى اليوم ببرق الزر يق لأنهم زرفوا لهم بالركاب وهم ينفذون ألخطه وشافهم هذلول قال وش هالركايب ؟ قالوا أهل خمس ركاب قال أكيد أنهم حنشل يدورون الفود مار انتم امشوا بالبل من هنا وأنا أبي أغير عليهم آنا ولي كم رجال غدي الله يجيبهم وهو يغير على الركاب وهم يهربون ويقوم يطردهم وهم يعقبونه على الإبل يوم التفت يمار هذيك العالم أغارت على البل أهل خيل وركاب ورجل وهم يتدابسون هم وأهل البل وتصير معركة له ظلال ويجيك هذلول مغير إلى ربعه على الجمل شعلان جمل أللحاوي كل غزواته يغزي على ذلوله ريمه إلا اكلمره غزا على الجمل شعلان يمار معه رديف قال امسك الجمل أبي أهوش وإذا حملت علينا القوم نركب الجمل ويطلعنا سبوق ما يلحق وهو يحول ويقوم يهوش رماح ما معه بارود وحملت عنزة عليهم وصار الطق عند الركاب واهتزوا قوم هذلول للهزيمة والتفت هذلول يبي الجمل يمار ما عنده أحد أثري خويه يوم شاف عنف المعركة طار قلبه وركب الجمل وهرب . خويا هذلول بعضهم مسك وبعضهم هرب وسلم وهي تضيق على هذلول ويأتي يبي يزبن جبل سبلا وهو يعارضه راعي اكذلول قال (( منيع يولد على رقبتك جاي . جاي . عند أبن نوبان )) قال (( تعاهدن )) قال ( عليك الله وأمان الله أنك في وجهي )) قال ( خذ الرمح ) ويعطيه الرمح ويركب معه . العنوز فكوا البل وجابوها ومسكوا اللي هم مسكوا من الشمامره يوم اجتمعوا وهو يلز أحد العنوز لابن نوبان قال أنت تعرف هاللي أنت مانع قال(( والله واحد من هالغزوا قال هذا الشويهري . هذا اللي عليه الطلب . هذا اللي يبيه العواجي . هذا اللي يجدع النذور عقاب على مسكته )) قال أنت الشويهري ؟ قال ((نعم أنا الشويهري ولولا أنك قلت لي انك ابن نوبان من المطاردة ومنعتن وعاهتن وأعرف إن المطاردة هم أقوى عنزة وأكثرهم رجال كان ماحطيت روحي بوجهك )) قال (( والله إما آنا ما اقدر أحميك من العواجي ))قال (( أنت منعتن وعاهتن بالله الأكبر وأنا وثقت بك وربعك هم أكثر الجعافرة ولكن فكن آنت وبني عمك وربعك أنا هالحين في وجهكم وبذمتكم )) جاء المرسال إلى ابن نوبان من عقاب العواجي وهو في سبلا قال ( يا لله كلٍ يجيب المنيع اللي عنده ) قال أقول يالشويهري قال نعم قال ( أنا ما اقدر أحميك من العواجي مار نبي نتوسل عنده غدي الله يهداه ) وهو يمسك يد هذلول ويجيبه إلى العواجي هو ربعه معه يوم جابوه للعواجي قال ( وش هذا ؟ ) قال ( هذا الشويهري ) . قال ابن نوبان ( وجهي ياعقاب أنا منعته ) قال عقاب هذلول ما يضفي عليه المنع أنا نذرت عليه جزور إذا جابه الله إما الشمامره اللي غيره لا بالله إلا بوجهك يابن نوبان

 

 

 

 

 

 

 

 

 

 

الحوار الذي دار بين هذلول وعقاب
ألتفت عقاب على هذلول قال أنت الشويهري ؟ قال نهم أنا الشويهري لكن يا عقاب والله ذبحتي ما به شرف أول شي بارد وثاني شي بوجه ابن عمك معاهدن بالله ألأكبر واليوم وجه ابن عمك وجهٍ لك .
قال(( ياهذلول ما والله ما يقنت على الله أشوف وجهك ولا والله تذوق الحياة غير ما ذقته )
قال ( ياعقاب كيف تذبحن ؟ وأنا ما خذيت حدار, ولا خذيت رواي , ولا خذيت رفيق , ولا قطعت من سلوم العرب الطيبة شين ) إلا منازع ها لوبره بيننا قوم ٍ على وضح النقاء ولا هي على بوق . واليوم ما توجب هذي ياعقاب )
قال (( أنت كل أخيذ ٍمن يالجعافرة ! من خذاه ؟ قالوا خذاه هذلول الشويهري ))
قال (( أدخل على الله ياعقاب لا تذبحن ! لا تقطع الحسنى بين العرب ! أنا هالحين حرج . ومنيع لابن عمك وأنا والله ما لامي غيري ))
قال (( والله لو أنت بوجه كل عنزة إلا أذبحك اليوم ما فرحت على الله إني أمسكك . وين فهيد ؟ وين محمد ؟ وين العنوز اللي أنتم رجمتوا في عين كحله كلهم وينهم ؟ كل هولا ماتوا بسبايبك وتيني أعتقك بعد ! والله لأتذوق ما ذاقوا ))
قال (( ياعقاب أنت تثاري بفهيد وفهيد ما والله فصلت به أنا العمر غالي والله والثلاث مثاني بالله إن ما عندي لفهيد لا يوم دنيا ولا يوم أخره تلاقوا شمر وعنزة بكحله رمي ٍ ثاير وعج طائر أما فهيد يوم جيناه الصبح ما والله لمسته طلبته أبي تحسن فيه ورفض وخلق الله ما أنا ورآه ))
قال (( اترك عنك هالسوالف لكن تبي توصي بشي وص قبل نذبحك )) وجاب الجزور وفا بالنذر اللي هو نذر على مسكه هذلول يبي يذبح هذلول في مذكاه
قال (( ياخو نمشه لك خمسين وضحا وسلعهن يجنك وأنا عنده امسكن ليا ما يجيك المدا ))
قال (( والله مداك هذا ما يسوى بس صيحة جعفريه ٍ يوم تصيح يمار أنت أخذ بعار ينه ))
قال (( عندي لك خمسين وضحا مع سلعهن وثانياً عندي لك عطوا بوجهي جميع طارفتك العواجيه . أعاهدك عليهم عهد ما يوخذ لهم لا هامل ولا مرعي ))
قال (( والله كود تذوق ما ذاقوا محمد وفهيد ))
قال (( ياعقاب إن ذبحتن ما أنا ناقص شمر وان خليتن ما أنا مزيد شمر لكن عليك الله وأمان الله إن لك عندي تسعين وضحا مع سلعهن يجنك في بيتك ))
قال وش اعمل فيهن ؟ تجيب من أبلنا وتسوق عن نفسك ثم تجي مره أخرى وتنهبهن وأنا ما أنا وراء الطمع أنا أبي جغمه هالدم ))
قال (( ياعقاب عندي لك مائه وضحا مع سلعهن واني أعاهدك بالله الأكبر على ربعك إني ما تعرضهم وأني أخو لك خوه ٍ يبيد الحديد وهي ما تبيد ))
قال عقاب (( لاتكثر ألحكي يالشويهري والله لو تجيب كل حلال شمر والله إني ما أعتقك إلا تذوق جرعه الموت ها الساعة ))
قال هذلول (( ربي وربك الله أجل ارخص لي أبي أصلي لي ركعتين وبصوت لي صوتين ))
قال (( أركع يما يحبر خشمك وصوت يما يتقطع فويهك ))
وهو يصلي ركعتين وهو يقوم ينخى شمر فخذ فخذ أول ما بداء في هايس القعيط صديقه سابقاً وأخر مانخى عبده السنا عيس هللي يقولون ( حظ العبدات من شمر . أبا الثواريات الصوت التالي نخى قال (( وين هايس ؟ وين اخو سعدى ؟ يا ما نخيتك ! وين الخرصه ؟ وين سودان الروس ؟ وين زوبع يلح رقبتي ؟ وين الطنايا ؟ وين الضياغم يحق أبوي وجدي ؟ وين السنا عيس يا طيابه كبدي ؟ وين شمر )) وهو يوصي هذلول له واحد يقولون انه بناخي لشمر قال أنت يا البناخي تره أمانه تحيى مع حيك وتموت مع ميتك انك توصل هالصوت وصلاتي هذي وسومتي لعمري من عقاب عند أطرف شمري وناس يقولون يسمعه أحد الشمامره ألاسراء وهو يقوم عقاب ويذكيه ذكاه خروف ويوم ذبحه عقاب ويجي الخبر شمر دري رشيد ابن طوعان وهو يقوم يرثى هذلول

[/color]

الكـبـد يـبـسـت وايـبـسـه هـــم هـذلــول=والــشــرب عــيــا لايــبــرد غـلـيـلـه
والــراس شــاب وشـيـب الـقـلـب هـذلــول=والـعـيــن عــيــا لايـكـمــل هـمـيـلــه
الـبـارحـه قـامــت تــنــوح ام هــذلــول=مـثــل الـخـلـوج الـلــي تـزايــد عـويـلـه
والله فـلاجـابـنــه الـبــيــض هــذلـــول=مـثــل الـفـهـد يـاطــب فـــرق الجمـيـلـه
والله فـــلا يـطـلـع لـنــا مـثــل هـذلــول=حــمــاي تــالــي شــمــر ٍ بالـدبـيـلـه
لـيـا ركــب ريـمـه عـلـى الخـيـل هـذلــول=كــم عـزبـه ٍ بالقـيـض يـطــوي صمـيـلـه
يـامــن خـبــر نـيــه عـقــابٍ بـهـذلـول=مــن يـذبـح الـبـارد وهــو مـــع دخـيـلـه
والله فـــلا تــبــر مـسـامـيـر هــذلــول=وعـقــاب مـــا رزت عـلـيــه النـصـيـلـه
يالله وان تــرمــي عــقـــابٍ بـهــذلــول=يـــارب يامـنـطـي العـطـايـا الجزيلــــه

مبيريك التبيناوي من الشريهه اللي يلقبونه بشاعر شمر ارسل قصيه يتوعد عقاب بهايس لما عرف ان هذلول نخا هايس وهي قصيده طويله ماوصلتني كله وعند توفرها نعدكم بكتابتها كامله

يالله ياللي فوق خلقك دبيره= مظهر حلاوي ميرها من ورا الليف
ياعقاب بدل ديرتك لك بديره = ارحل وخل الضغن مابه مصاريف
اخلوا ضمارين ٍ بخشم العميره = مربَ زرفات البكار الهراجيف
لايقمشك محمي دبيل الجزيره = اشقر يروع القلب ويهيل ويخيف
يجيك يتلنه طيور الجزيره =ترهن ليا راجن على الشيخ ماشيف
شقر ٍ سحايلهن سواه السعيره = والا سنا نار ٍ حدتها العواصيف

 

 

 

 

 

 

 

 

 

 

نرجوا ان قد وفقنا في سردهذه القصه
وسوف ان شاء الله نكمل قصه هايس القعيط كيف
أخذ حق هذلول من عقاب العواجي


المصادر


1- سعدي الشويهري رحمه الله
2- محمد حمود السويدي يرحمه الله
3- اشرطه كاسيت بصوت الراوي ساكر الحمزي
4- كتاب بعنوان ذبحه هذلول ينسبون روايته إلى فرتاج الذنيب والله اعلم
5- الراوي محمد غافل السويدي يرحمه الله
6- الراوي حمود العمران اطال الله في عمره
7- الراوي عقيل سند السويدي
8- هذلول سعدي الســــــويدي
9- نايف هلال الســـــــــــويدي
10-خشمان هلال الســــــويدي
11- فرج هلال الســـــــــويدي
12- فهد سميحان الســــويدي
13- صغير مطلق الســــــويدي
14- سعيد دعسان الســويدي
جمع / فرحان محمد السويدي[/

 

 

 

 

 

 

 

 

 

 

ماقصرت اخوى ، سرد تاريخي مميز ، والاحلى انه من شيبان السويد اللى الموضوع يخصهم

يعني توثيق تاريخي ، ونعم بالسويد كلهم ، شكرا اخوى ماقصرت

 

 

 

 

 

 

 

 

 

 

بارك الله فيك وكل من ذكرته ثقه بالنسبه لنا ولايجي منهم قصور وتكفى سلملي على حمود العمران سلام كثير قصه متكامله عن هذلول الشويهري وحياته وبعض حيافته وعساك على القوه دوم...!!!!

 

 

 

 

 

 

 

 

 

 

لا هنت يا المهندس على هالمشاركه ..

 

 

 

 

 

 

 

 

 

 

مجهود رائع ومعلومات مميزه
يعطيك العافيه شكرآ لك
ولاتحرمنا من ابداعاتك الجميله
ابن برزان