العذر يا لوّام صار العسل سم =الهم عشّش في قلوب الرجاجيل
الهم انا ويّاه ربع وبني عم =بيني وبينه طول عمري مواصيل
سقوى سقى الله ساعة مابها هم =تسوى من الدنيا سنين الغرابيل
ساعه بها يا خافقي ريّح ونم =اضرب بعرض الحايط الهم بالحيل
سعيت في مطلب طموحي ولاتم =صارت عثور الحظ دونه عراقيل
موت الحرج .. هداج ماعادبه جم =ولاجاه (سياره) على ضمّراً حيل
اهني العميان والبكم والصم =واحسد مجانين البشر والمهابيل
قال الشلاقي يا سحاباً على رم =يمطر سهوم الموت ما هي هماليل
أقدار والإنسان ما يرخص الدم =لكن شمات الناس يفرح مغاليل
كلمة نفاقاً تجمع المدح للذم =تكسب بها سود النوايا محاصيل
خطو الغشيم السالفه خمها خم =والا يبدّلها من الأصل تبديل
يتبع طريقة كسب الأفعال والضم =ويبلش اليا عزّت عليه التفاصيل
الليل لو عسعس ولو حل والتم =لا بد من شمساً تجلّى بعد ليل
الله كريم ويجلي الهم والغم =ودروبنا عقب الصعوبه تساهيل