ياشارب التنباك شربه مهو كيف=يامدور الطولات مابـه شكايـل
لاجالي هم ولا مقـري ضيـف=ولامودع خـط الردييـن طايـل
اعلمك بالكيف يادايـر الكيـف=الكيف دربه مايبـي لـه دلايـل
اعلمك بالكيف يادايـر الكيـف=دنيين نجور الماو فوق النثايـل
اعلمك بالكيف يادايـر الكيـف=بني الرباع السود ويـا مقايل
بارباعهن بيض الدلال المهاديف=مشروبهن وقع السحاب الشخايل
فنجالهن يشدا خضاب الغطاريف=ورسن صبغ بكفوف شقر الجدايل
وصينيه يقلط عليهـا مراديـف=وحب اللقيمي فوق عصبان حايل
اعلمك بالكيف يادايـر الكيـف=ركب العقيليات والـدل مايـل
اعلمك بالكيف يادايـر الكيـف=حط الكفن والجوخ فوق الاصايل
اعلمك بالكيف يادايـر الكيـف=ضربت عدوك بالجموع الثقايـل
اعلمك بالكيف يادايـر الكيـف=تدليل حد السف في كـل عايـل
مع ربعة تفرق حساب المواليف=واليا تلاقو فوق شهب الصايـل
اعلمك بالكيف يادايـر الكيـف=بيضا من الخفرات شقرا جدايـل
اعلمك بالكيف يادايـر الكيـف=شي تخلق من ضلوع الشوايـل
اعلمك بالكيف يادايـر الكيـف=يامدور المشهور هذا الصمايـل
للشاعر /
عدوان الهربيد ...
/
أبو نادر السنجاري ..!!