مسواكي ملازم معَ مسباحي=ودشداشتي معزم على تقصيره
واللي تبين للملا افلاحي=والنفس الله واعلم بتطهيره
والناس تشره عالكبير الصاحي=ولا الصغير يخون به تعبيره
ومن طبعي مسمع لغوة النباحي=رغم اني متمكن على تدميره
عليه ما وجهت رمي سلاحي=لجل الذي واجب علي تقديره
الفات مات ولالنا بالراحي=حنا اعيال اليوم واهل اليره
ادري جدودك شيدو اصراحي=بس انت ما ساهمت في تطويره
وترى النسب مايرفع اللي طاحي=العز بالتقوى وحسن السيره
لو ترجع لحطاب ابن سراحي=كانك ردي من يشتريك بليره
وانا مع العربان بيض اصفاحي=ولا انت تاريخك ظهر تزويره
قدرك مع الدولار غاب ولاحي=يصعد وينزل يتبع التسعيره
وأسال هلك وافهم شقال بداحي=راجع كلام العنقري وتفسيره
الجود والله جود ابو الدحداحي=وحنا نحسد من يملك القطميره
أمجاد راحت والعلوم ملاحي=وبعض المجالس ناسيه تسطيره
وشمر فخر متوشحنبه وشاحي=مبطي وانا اشرب من زلالة بيره
وربعي هل الشعبه تجود رواحي= بالموقف اللي يرهب من الذيره
مو هذا موضوعي كبيره اجراحي=حملي عسر وارجا الله في تيسيره
الحزن طفا كل شموع افراحي=ولي واقعٍ يصعب علي تصويره
انخلطت اوراقي وطفا مصباحي=وانكسرت اقلامي بعصا الخنزيره
ومثل الذي بايت بوادي اشباحي=يجفل اليا منه سمع تصفيره
وهبت علي من كل صوب ارياحي=وجتني خيول بليس معها مغيره
وخلت سيوفي يكسرن ارماحي= وصارت علينا صيحة التكبيره
من يربح المليون ياقرداحي=صعبه على اللي ماوسع تفكيره
وحنا الخسرنا وغيرنا مرتاحي=نفذ بنا ماراد في تقريره
يبكي علينا بدمعة التمساحي=هدم حضاره ويدعي تعميره
خلانا مثل الطير دون جناحي=ولاندري والله وين درب الخيره
والحل بدينا وعندنا المفتاحي=ماباقي الا راينا وتدبيره
هلال الصلفيــــــــــــــــــــــــــــــــــــــــــــــــــــــــــــــــــــــــج