يستثار الشعر والمارد يفيق = بوح روح وغيض في رحلة فكر
ابني الاهرام بأحجار العقيق = واختصر كل المعاجم في سطر
ان سبقني بالجنون ابن زريق = اختلفنا بالزمان وبالسفر
كنت امارس حق قانون الرقيق = للهقاوي لين صارت في خطر
كان انا قلت آه من جرحً عميق = اعذروني سلّم الله من عذر
كان همي عبد0 قولو له عتيق = معتقه ما ابيه جيّاب السهر
حايراً مذهول في وادي سحيق = للسباع وللكواسر فيه اثر
في مضارب غربتي ضاع الطريق = داهمه ريح البوارح واندثر
لا طريق ولا صديق ولا رفيق = ما سوى اعجاز النخل بأرضً قفر
من يقول الارض بأبنادم تضيق = لين صارت دار حبس و لا مفر
علقم الايام بأكواب الرحيق = يمنح الانسان تصميم وصبر
اكفخ الجنحان يالحر الطليق = الليالي كلّها درس وعبر
ماشيً واسمع على الشجره نعيق = تكثر الغربان بأغصان الشجر
كل حرّاً ماعشق قمة طويق = والله انه خاب لو عاش الدهر
قال واحد كان لي مجداً عريق = قلت كان وكان ميّت في قبر
يا ضعيف العزم والناصح شفيق = خل قلبك مثل جلمود الصخر
تخدع الابصار يالغصن الوريق = ما دريت انك ضريع بلا ثمر
موتة الهقوه بصدّه من صديق = طعنة الايام غدراً بالظهر
قلبي اللي حمّله مالا يطيق = حظي العاثر غرابيل وكدر
ليه سلمى ما تنزّل للعشيق = لو تكون الروح لرضاها مهر
صابراً والجوف به جمر الحريق = جعل جمر الجوف يطفيه المطر
اتعلّق بالسبب مثل الغريق = مؤمناً بالله واحوال القدر
لحظه جنونيه لا بد منها
العرض العادي
