قصيدة مدح في غصن صحن الابي سعد الشمري حيث انه عمل بي جماله ما انساه ما دمت حي
الطيب ســـــــــــوقن والمخاليق تجار = احدن خسر واحدن توفــق ببيعه
بعض البـــــــشر ياطب بالسوق يحتار = صيده من الهزلات مـــابه نفيعه
ماله مــــع اهل العرف مارد ومصدار = شبحه قصير ولا يــروم الطليعه
وبعض البــشر يتعب على كسبة الكار = زبون جزله ما يحـــــب الهكيعه
مثل ابو خالد مكرم الضيـــــف والجار = الطيب دايم ياغــــصن لك طبيعه
امْدحْـــــــــــك قدام الملا سر واجهار = مكارمك عنـــــــد الخلايق نذيعه
عساك دايم يابيــــــض الوجه بإيسار = من يسر تنفـق ما تجيك الفجيعه
للــــــشر ردادن وبــالخيــــــر مدرار = وخيرن بذلـته مانت رجّاي ريعه
عمـــــــلْك ترجي رحمة النافع الضار = رب الملا محي الفجوج الوسيعه
لو كــــــــبرت القالات عندي له اكبار = بعد الولي عـندي سدودن منيعه
عندي غصن يرسي مثل جبل سنجار = ما خاف بـعد الله ولوهي شنيعه
يشيل حمـــــلي يابركة بي على الدار = ياضامني حمــــل الليال المريعه
يوم اقبلت بقــــــــعا علي تطلب الثار = ومضارب القـشرا بجنبي وجيعه
الياس في حبـــــل الرجاء صار بتار = وبعض المواقف وصّلت للقطيعه
رديتها ياصــــــــــــاحبي عدة امرار = مدات كفـــــــك يـم كـفي سريعه
فرخ القطــــامي من مواكير الاحرار = من صيدته تشبع بطونن مجيعه
خفيف نــفس ومن صليبين الاشوار = ومسْتن في سنـــة نبي الشريعه
ولا هو غريبـــن طيبكم يابن الاخيار = غريب لو تمشي دروبن وضيعه
مانساك مادمـــــنا على القاع حضار = جمايــــــــلك عندي تراها وديعه
رد الثـــنا يلزم علـــــــــــــينا بتكرار = ولا همنــي راع الردى والخديعه
وصـــــــــلاة ربي عد همّال الامطار = على محمـــــد سيد الامه شفيعه