عود لسانك دايماً ينطق الزين = ماتنطقه يااللآدمي دومِ محسوب
محسوب عند اللي خلقنا من الطين = ماغيره احد(ن)يغفر الذنب ويتوب
رب الرسل صالح وموسى وياسين = واسماعيل وابراهيم وعيسى وايوب
احذر من الغيبة ترى فعلها شين = كم واحد(ن) بأسبابها حصل ذنوب
والكذب ماهو طبع ناس(ن) ميامين = احذر يلاقي الكذب في نفسك دروب
وإن شفت نمام الحكي مبحلق العين = مجلسه خله جعل مجلسه معطوب
واحذر تحمل نفسك الهم والدْين = يضيع وقتك بين طالب ومطلوب
لالا تماشي ناس ماهم حريصين = على صلاة الرب علام الغيوب
ودور على المحتاج بين العفيفين = اللي مع الحاجه صراعات وحروب
من عفته تَحَسٌبَهْ ضمن الغنيين = يبيت ليلة دون اكل(ن) ومشروب
وإن شفت لك ناس(ن) يتامى حزينين = افزع بما تقدر وذا فعل مرغوب
وللضيف خلك من رجالٍ كريمين = ترى الكرم للنفس مرغوب محبوب
وأحذر سؤال الناس ولنفسك تهين = اطلب كريم(ن) عنده الرزق مكتوب
( احمد بن ناصر المحرج)
( ودور على المحتاج بين العفيفين ) (14)
العرض العادي
