يالله ياللي كل داعــــي تجيبه ** يافارجٍ كل الأمـــور العصيبه
سبحان من ذا النمل يسمــــع دبيبه
ياواحدٍ عالٍ على كـــــل عالي
انصحك تحذر من امورٍ كثيرة ** مهمة ودايم علينا خطيرة
تبي عقولٍ وافياتٍ منيرة
تخاف وتخشى من عزيز الجلالي
بعض البشر يصنف الناس اصناف ** حسب مزاجه يعطي اقسام وأوصاف
يشوف نفسه كامل ومابه خلاف
هذاك جامي وذا ترى ليبرالي
وإن جيت في يومٍ تبي تسحب فلوس ** محتاجها في شي عاجل ومحسوس
ودخلت صرافة بها دور ممسوس
وجاك السرا وانتى تهوجس وسالي
ووراك واحد كنه يبغى يصيدك ** ملقوف وده يعرف كم في رصيدك
ماهوب من اهلك ولاهو قريبك
طبعه ولايتركه هذا محالي
والبعض ذكر اسم المرأه عنده إجرام ** يقول الإنثي ياعرب وإنتم اكرام
ماهوب صاحي ظنتي صابه سقام
اقتد بخير الخلق ياابن الحلالي
واحدٍ اناني بكل شي بحياته ** ياخذ ولايعطي وهذي صفاته
اعوج بطبعه لين ساعة مماته
ترى البشر مردهم للزوالي
والبعض راي الناس دايم يسويه ** يفعله ما يحسب وش يصير تاليه
مهزوز وما تهواه نفسه يخليه
يبي مديحٍ يرفعه للعلالي
واحدٍ بما يفعله دايم سريعي ** وإن شفته ياكل قلت ماهو طبيعي
وبسيارته يمشي بشكلٍ مريعي
من شافه ظنه عنده العقل خالي
والبعض ينشر شي عبر التواصل ** ماهو صدق مكذوبٍ وغير حاصل
مايدري إن الذنب لابد ياصل
محصيه ربٍ عالم بكل حالي
والبعض للخارج يسافر سياحة ** يدوٌر علوم الردى والأباحة
تعامله سيئ وفيه التــــــــناحة
فا اماكن الشبهات يقضي الليالي
وختامها يالله يارب البرية ** تجعل لنا عيشة وحاله هنية
وتغفر لنا ذنوبنا والخــــطيه
ياالله ياربي عليـــــك إتكالي
( احمد بن ناصر المحرج )
... ( ملقوف وده يعرف كم في رصيدك ) ... ( طرق المروبع قصيدة رقم 9 )(59)
العرض العادي
