ساجر الرفدي من فرسان قبيلة عنزه فارس لايشق له غبار
ومن اشجع اهل نجد وقبل يقولون كان مدعاه
يامن الواحد ابغض له عرب قال ياعلكم بساجر
عاش بداية حياته "بالشملي" قريه من قرى حائل
ولكنه جلى الى اقصى الشمال وترك حائل . !!
وسنذكر سبب خروجه الى الشمال ..
ان من المعروف عن ساجر ان اكثر مغازيه كانت على قبيلة مطير
ولكن تمادى ومثل مايقولون " انقرد "
وصار يتحدى شمر وتحديدا الأمير : عبيد بن علي الرشيد
من ضمن ماقاله ساجر يتحدى الامير عبيد :
طلال قل لعبيـد بينـك وبينـه=شلون يامن والعمارات عمـار
شلون تقبل لـذة النـوم عينـه=ووراه ربع مايهابون الاخطـار
من باب بغداد اليا باب المدينـه=يلقى بني وايل على الكود صبار
وصلت القصيده للأمير عبيد " وحطها بقلبه "
مرت الايام ..
وصادف ان شمر كلها غزت مع الامير عبيد
ولم يبقى في حائل الا ربوع قليله ...!!
فسمع ساجر الرفدي بغزو الامير عبيد وانه لم يبقى في حائل الا القليل
فدخل حائل وآخذ حلال شمر .. وهرب به
رجع الامير عبيد الى حائل
فـ قال : انا اخو نوره وين حلال شمر ؟
قالوا: آخذه ساجر وهرب به
وقال الامير عبيد: جيبوا لي اخبار ساجر وينه نازل
قالوا اللي معه : يذكرونه نازلن على "ذباذب" ؟!
قال: وينهي ذباذب هذي ؟!
قالوا: بالشمال
فجهز الامير شمر وذهبوا للذباب لإستعادة حلالهم
وعندما وصلوا للمكان المقصود
وجدوا رجل طاعن بالسن ومعه غنمه
فقال الامير عبيد : وين هو ساجر ؟
قال الرجل : يا اخو نوره ساجر رحل له ستة ايام للعراق
ويلحقونه شمر فوجدوه دون العراق
وتصير بينهم معركه وينكسر به ساجر " وآخذ بالهروب "
استردت شمر حلالهم وياخذون حلال عنزه وبيت ساجر
ويركب الامير عبيد فرسه
فـ قالوا اللي معه : وين يامير ؟
قال عبيد : نبي نلحق ساجر
قالوا : يامير حلال شمر ورديناه وحلالهم وخذيناه وبيت ساجر قطعناه
وش بقي ؟
قال عبيد : وانا اخو نوره إلا اخلي ساجر يعيف المغازي
ويركب عبيد على ضهر كروش ويطارد ساجر ألى ان وصل ساجر الى داخل العراق
وعندما سمع ساجر ان عبيد لن يتركه
ركب "الريل" اللي هو القطار وآخذ بالهروب الى سوريا
وخذا فتره بسوريا وبعد فتره طويله رجع وسكن بعرعر
من ضمن ماقاله عقب هالاحداث :
الله مـن عيـن تزايـد حزنهـا=والقلب من صكات الايام مسمور
من شوفتي داري تغيـر وطنهـا=من عقب ماني داله القلب مسرور
دنولي الحمـرا ومـدوا رسنهـا=وهاتوا ذلولي وانسفوا فوقها الكور
ياما حلا المسلاف باول ضعنهـا=مستجنبين الخيل يبرا لهن خـور
يومن انها نجد وانامـن سكنهـا=واليوم مايسكن بها كـل ممـرور
شامت "لاخو نوره" واناشمت عنها=اللي يصبح به على فجـة النـور
وانا احمد اللي فكني من شطنهـا=ومكيف مابين عرعر وابا القـور
فرد عليه محمد بن دهيثم الشمري من المختار من سنجاره :
ياركب اللي راكبه ما محنها=حمرا شناح الكوع ما يزحم الزور
تلفي لساجر شوق رادع وجنها=ياشوق من قرنه على المتن منثور
هو ليه يا ساجر تنحّيت عنها؟=أقفيت عنها خايفٍ تقل مذعور
جّزوك عنها اللي وساعٍ طعنها=عيال الطنايا هادمه كل طابور
يوم أن عبدالله بكّفه مكنها=غدولها عيال الطنايا تقل سور
نجد لنا ما نعطيه في ثمنها=وعن ما يبيها عندها دايم حضور
نرخص عمارٍ غاليه من جهنها=ولا نعطيه لو لحقنا عندها جور
نجدٍ حموها زوبعٍ مع يمنها=عيال الرجال مطوعت كل مسطور
يوم أن عبدالله ولاها ضمنها=خلا ، آهله بافراح وسعود وسرور
القصه الثانية هي مع الايداء
عندما طلع بغزواته على الشمال(عنزه) وخذا عنزه( الصقور وقوم ابن هذال).
وكانو الدهامشه من عنزه اصدقاء لمحمد العبالله وشيخهم ابن مجلاد راكان
وجنبهم لانهم صديق ٍ له ولكنهم عرضوا له وقالوا الدهامشه ماتوخذ العنزيات
وحلال عنزه.
وارسل لهم ابن رشيد""لراكان"" وقال حنا جنبنا صديقنا ورحنا لعدونا واليوم وش
بدا........
وين راكان ....قالوا نايم ؟
قال اقعدوه الامير يبيه ،،
قالوا راكان ليا صار نيم مايقعد !!
قال انا اقعده وانا اخو نوره
ويأشر الامير الى البيرق .. طليفيح ..
وآخذ عنزه والدهامشه
وهرب ابن مجلاد والدليل قول الشاعر :
راكان مايقعد ليا قيل غافي=جنب توالي لابته كب الالزام
العام جيتوا بوقة ٍ بانجعافي=وانا احمد الله يوم لي هب الاولام
والقصيده هي لمنصور ابن مكمي الاسلمي :
قال ابن منصور من القيل وافـي=يبدى بذكر الله عدد مشي الاقـدام
من كوكب ٍ عيا على الموح صافي=عد ٍ روي ٍ كل من جـاه ماحـام
قلته ولاني من العواقيب اخافـي=قلته لمن تزهـاه الامثـال طمـام
حر ٍ ليـا منـه تنهـض وشافـي=تاخذ عنه بقـع المخاميـر خـرام
ذيب العدا زبـن العيـاد المقافـي=يلفح بجنحان السعد كان هو حـام
فضـخ بكفـه سايقيـن العطافـي=واودع عزايمهم شتاة ٍ من العـام
ياما حلا وان قالوا السبر شافـي=رد العيون وقالوا الشـوف قـدام
هاضوا على مثل الجراد الكتافـي=قبن ٍ يلاون المصاريـع صجـام
خيل ٍ مشاويش ٍ وجيش ٍ ردافـي=عليه منضود الافرنجـي والاروام
اليا حورفوا بقشوشهن كل شافـي=بايمان عطبيـن الذخايربالارحـام
ياما وقع بوجوههم مـن سنافـي=يفراه خفـاق الجناحيـن باسهـام
من حاربه يشرب من المر صافي=ويصبح عليه بكتمة ٍ عقب مانـام
تشبع بها برق النسـور الهوافـي=ولا ينجلي غفوه الى وقت الاظلام
اخوه ابو ماجد اليـا قـال يافـي=بالوذة ٍ ماناشهـا الصفـر بلحـام
ضار الضواري باللقاء ما يخافـي=بالهند من روس المناعيـر زمـام
تلقى جواده عنـد تـال المقافـي=بساعة ٍ ولد الردي كـب الالـزام
والا محمد كنـه الليـل ضافـي=صلصال نجـم ٍ للفراعيـن هـدام
عقيد جمعات ٍ تـدوس الشعافـي=يفطر على شيخ الجهامه ليا صـام
محمد ليا قيل الشتاء بـه حفافـي=تلقى الشحم فوق المواعيـن ردّام
يذبح كبار الروس ماهـو مفافـي=يشبع طيوره مع نسوره ليـا قـام
يامـا رعينـا بـه ديـار نظافـي=ريم ٍ واهلهن عندنـا تقـل خـدام
مصرانهم يلونهـم مـن خلافـي=من خوف يفضاهم مع الصبح دمام
راكان مايقعـد ليـا قيـل غافـي=جنب توالي لابته كـب الالـزام
خليتوا الحلـه وبيـض ٍ عفافـي=وراحن بكم عن يمة المال عـزام
صاحوا عليك مزينيـن العسافـي=اللي يعسفون المصاعيب بخـزام
مع وجه شيخ ٍ تمتنيـه الضعافـي=نجم ٍ على كبد المعـادي ليـا زام
قبلك دغيـم ٍ رازنـا ثـم عافـي=ومن راز مروين المغاليل مانـام
جاب السلايل بس يبـي العوافـي=يطلب بعينه بس مشروع الاسـلام
يخاف من عادات بعيـد المشافـي=ليا قيل بالحره فضخ يمـة الشـام
يا مطلق الايداء ترا العمر يافـي=ولا ينشمت في غيب غرات الايام
العـام جيتـوا بوقـة ٍ بانجعافـي=وانا احمد الله يوم لي هب الاولام
جاك العقاب اللي يدور العلافـي=يصيد مثلينك ليـا صـار معتـام
ياما خلاّ ولايشكم سوات الجفافي=مادف بكفه على الحول مـا قـام
مزن ٍ تردم شافي الغيب ضافـي=يمطر علـى العتبـان دم وسمـام
سيله غدى بالضيط يـم المهافـي=وتقاسموا مال العتيبـي بالاسهـام
عشبه على خشم ابرقيـه عيافـي=تلقى به الطير الحقب والرخم حام
برقه لميـع مزوغـات الشلافـي=يتلن شعشـاع ٍ للاضـداد طمـام
وانا اذكر الله عدد رمل ٍ وسافـي=على النبي صلوا عدد جرد الاتهام