قصيدة عيسى المهوس بالأمير /
محمد بن عبدالعزيز المتعب الرشيد
امه موضي بنت حمود العبيد الرشيد
والذي يقول فيها الشاعرعندما ذبح اولادها في المجزرة المعروفة بذبحة العيال
تعززو للي جلت للمدينة * اللي عيال ابوه تعشوا عياله
ومحمد العبدالعزيز هو اصغر ابناء الجنازة من امهم موضي الحمود العبيد
وهم ثلاثة : متعب ومشعل ومحمد
وسعود ابو خشم اخوهم من ابوهم خواله السبهان ويوم الذبحة جلوا به خواله للمدينة عن سلطان وسعود الحمود العبيد الذين قاموا بالمذبحة المشؤومة!!
اتمنى تعجبكم
واتمنى انها تكون بالفعل لأول مرة تنشر بالنت
لأني لم اجدها بعد البحث..
يارب تاقا الشيخ معطي حذاياه = جميعها والباقية والقليله
محمد عسى الافات كله تعداه= وعسى حياته بالمعزة طويله
خصال الصخا والجود كله سجاياه=يفرح اليا مد العطايا الجزيله
يعطي ولا حسب لكثرة عطاياه=كل لحقه فوق متنه يشيله
هذا الكرم والجود مابه مجاجاه=سبحان رفاعه على كل جيله
يارب عن كل العواثير تاقاه=وتحييه يامحيي الارض المحيله
عريب جد من المناعير منشاه=كل الجدود الطيبة يعتزي له
ياناس شارات السعد به عرفناه=ولا ظنتي يطلع بجيله مثيله
ترثت مناعير جزال عطاياه=هل المضيف اللي علومه طويله
فرسان عيان نهار الملاقاه=بحور الندى هل الشرف والفضيلة
وجده حمود اللي علومه قديماه=الليث ابوماجد عزيز القبيلة
كم من طريح علّم الخيل تاطاه=وكم عايل بالسيف راسه يشيله
كل المراجل حاشها الشيخ ووفاه=الحيد شيال الحمول الثقيله
محمد ٍ من نادر العش مجناه=ولاهو كثير لو نفل كل جيله
من نسل ابو متعب زبون الونياه=نضايض الصنديد واف الخصيله
الشيخ ابو متعب ذرا نجد وغطاه=راس العرب حامي عقاب الدبيله
سور العرب عن ماينوبه وماجاه=وقالات قومه كل ثقله يشيله
زيزوم جمعات وحمال قالاه=وكم دار قوم طيّره عج خيله
بعيد شوفات وجماع صولات=وعزي لمن عاداه واطول ليله
كل العرب هم والوزا جوه فزعاه=عزي لعين اللي تعرض سبيله
سلطان نجد ما بحكمه مراواه=لو شربشوا هلل قلوب الهبيله
كم نار حرب ساعره ثم صالاه=عام بثر عام سنين طويله
عيا عليه الضيغمي مرذي عداه=بالمارتين وبالسيوف الصقيله
حم حم على الزايد وتثوره وممشاه=واربع سنين غزوته طال طيله
واتلف بدرب الحكم خيل وخزناه=يعيش شيال الحمول الثقيله
ياما غدا ضده تحت عرش ماطاه=ضاقت عليه ولا لقا درب حيله
وعاف الهدير وبدل الضد برغاه=واحاط به مكره وطنب عويله
وعرعه ابو متعب لضا الحرب واسقاه=ورما السلاح معذر ما يشيله
وعساه منصور بدينه ودنياه=وعسا السعد في كل درب دليله
ومتعب فزع لو طير شلوا تنصاه=صغير سن مار يشفي غليله
صغير سن عاضده باول جناه=نعم العضيد ان حل يوم النصيله
عسا السعد والشد فاله ومبداه=يعطيه وال العرش ما يرتجي له
وعسا سهوم الشر كله تعداه=في جاه من ندعي ومن نلتجي له
ومشعل يزها المدح والمدح يزهاه=ياشيخ راقي طيب راس الطويله
كل السعد بحجاج مشعل نفرناه=ماهو خفي كل بعينه يخيله
يسر عين اللي على الضد ينخاه=لا قربوا شحص المهار الاصيله
يالله ياللي خلقه بي رجواه= ياللي تصرف دقها مع جليله
انك تساعدهم سنين بطياه=آمين يامنشي ثقيل المخيله
قلته وانا مالي على الشعر مشهاه= الا محمد قلت تظهر جميله
وصلات ربي عد مزن نثر ماه=على النبي راع الحرم والوسيله