الحمد للدايم على العرش موجود=الواحد المحصي جميع العبادي
بأمره نجا ابراهيم من قوم نمرود=نيرانهم صارت سلام وبرادي
يامنقذٍ ايوب من مرتع الدود=مابين كاف ونون امرك وكادي
يامنجيٍ صالح نبيك مع هود=يوم غضبك حل بثمودٍ وعادي
وانجيت يونس داخل الحوت مصيود=جل جلالك ياسميع المنادي
وبرأت يوسف يوم كادن له الكود=وايضا عصمته من مهاوي الفسادي
وعليت موسى فوق فرعون ابو جنود=وعالطور كلمته بجلالك وكادي
والعذرا مريم حملت وجاه مولود=ومن قدرتك طفله نطق بالمهادي
صلب الحديد يلين بامرك لداوود=والريح لسليمان بامرك تقادي
ومن ثم صلاتي عالنبي ماله حدود=على محمد خير كل العبادي
مكارم الاخلاق والطيب والجود=صادق امين وحاز كل المبادي
خير الانام وبالسموات محمود=شفيعنا يوم الخلايق تنادي
ناصح الامه وكاشف الغم ولهود=امامنا مهدي لسبيل الرشادي
زاح الاصنام وكبٌل الشرك بقيود=لتوحيد رب العرش جاهد جهادي
دستوره القرآن بالوحي مسنود=ماينطق الا كل قوله سدادي
من سار في دربه بلغ كل مقصود=بالدنيا طاب ونال دار السعادي
مع حور عين امدوره عيونهن سود=سيقانهن مثل البرد والزبادي
في فاكهه متنحصي وطلح منضود=وقصورها بفضه وذهب هي تشادي
وانهاره تجري مع ضل ممدود=دار النعيم السرمدي مو نفادي
ومن شذ عن نهج النبي ذاك مقرود=انا اشهد انه تايه الراي غادي
بدنياه يشقى وعيشته كله انكود=وبالاخره للنار يصبح وقادي
مغلول غل وبه سلاسل ومصفود=مثواه وادي ويل مجرم يقادي
يشرب حميم يقطع امعاه وتعود=وطعامه الزقوم لو راد زادي
واعضاء جسمه كله لفعله شهود=ينطقهن المنطق حجر مع جمادي
يالعبد لاتطغى ترى عندك حدود=هالك ترى من زاغ عنه وحادي
احفظ صلاتك والصلاوات عامود=اول عمل تسأل عليه العبادي
واعلم اذا زكيت مالك ترى يزود=ومن يمنعه ماله حرام ويبادي
ومثال ذلك ثعلبه وقصته شهود=يوم(ن) عصا الله صار ماله رمادي
والصوم اجره يوهبه صاحب الجود=ارضا جميع الخلق جوده وزادي
والنفس من طبعه على التهلكه تقود=خالف هواها وطبعها للعنادي
ولوالدينك ابذل بكل مجهود=ترى مبرتهم علت عالجهادي
ومن ينصر الله ينصره شي ماكود=ومن يتق الله يرزقه بلا كدادي
واعلم ترى النمام ماعاود بفود=والكذب والغيبه امر غير عادي
وفعل المعاصي يورث الذل وانكود=وذكر الله يجلي عن القلوب النكادي
والناس تدعي اموات والحي موجود=تجعل مع الله في شؤونه اندادي
وباب الأئمه والطواغيت مسدود=وباب الله ماسده بوجه العبادي
الا بوجه الكافر الملحد لحود=واهل الزنا والظلم واهل الفسادي
الا اذا تابو لهم كل منشود=لامنهم سارو بدرب الرشادي
واعلم ترى البدعه عمل شر مردود=من سنها ماله شفيعٍ وهادي
وياكثرها في وقتنا وقامت تزود=مستارثينه من الجهل والجدادي
الناس تفتي بدون علمٍ وماكود=اغواهم الشيطان بالشر ينادي
من رحمة الله مفلس ابليس مطرود=واقسم علينا ايضلنا عن الرشادي
عيٌا وابا لايسجد لآدم سجود=هذا دليل الكره مامن ودادي
عدونا ونمشي برايه وله جنود=هذي علامة ذلنا والترادي
الدين كامل والنبي عنده ايذود=ومعه الصحابه بالشدايد سنادي
الله مدحهم بالوفا وصدق وعهود=ورجال نعم ارجال عليه اعتمادي
عباد ليل ولا غشا عيونهم نود=برواحهم للدين ضحو وسادي
وايمانهم راسخ ولاتهزه حشود=من صدق نيتهم يفر المعادي
راضي عليهم ربهم وابتغو زود=فيهم على الكفار غلظه وشدادي
امثال ابو بكر الثبت كنه الطود=صديق بمواله تصدق وجادي
والكاسر الفاروق لافعاله شهود=ان سلك وادي يسلك الجن وادي
وعثمان فارق دنيته ساجد سجود=يوم الخوارج دبروله مكادي
واليكرم بنفسه بلغ قمة الجود=علي ابن ابي طالب عريب الجدادي
هلال الصلفيج