كلاً على الدنيا مع الناس معتاش = لو كان ما له بالجمايل عوايد
الفرق باللي للنواميس حواش = لاصارت هموم الحيارى قلايد
وان ماكتبت الشعر في مدح عماش = لابارك الله في كثير القصايد
مدحي على برهان ماهو على ماش = عماش حاش النعم والنعم كايد
الله يبيّض وجهه ابيض من الشاش = ابو طلال اللي بالافعال زايد
علمه ينومس كل مطنوخ شوّاش = من لابته لا عدّوا اهل الحمايد
ابن سحيم اطريه واقول له عاش = الله يجنّبه الكدر والمكايد
يشفق على المعروف والوجه بشّاش = مايعتذر لو جو له اقصى البدايد
والطيب يا أهل العرف دانه وطوّاش = من دونها يرجع جسور الولايد
واللي خذا للطيب مسرى ومغباش = يمدح ومدح الناس راس الفوايد