اقبلت متبخترة والعقل طار = حوريةٍ ماشفتها بين العباد
شردت اهوجس لحظةٍ والفكر حار = قلبي خفق والنبض كنه في ازدياد
سألت نفسي وش جرى لي ويش صار = الفكر شوش واطلب الله السداد
قالت لراعي التكس وديني المطار = ظنيتها بتغادر حدود البلاد
جت الخطوط ووقفت في الإنتظار = يومٍ وصلها الدور قالو ياسعاد
يوم إجلست حسيت كن الراس دار = قالت لي وش هو مطلبك ويش المراد
وش بك تلاحقني من اولة النهار = ماني من اللي يخدعه كثر الوداد
قلت اسمحي لي كلمتينٍ بإختصار= ماقصدي الشينه ولا عندي عناد
ماني من اللي طبعهم طبع الشرار = ولا من اللي نارهم دايم رماد
شرواك بنت الأصل والناس الحرار = اللي لهم في الطيب اركان وعماد
ابي نسبكم في العجل ماهوب عار = والصمت عم وبيننا لحظات ساد
قالت على هونك ترى ذا الوقت جار = ابوي شيخ بديرته شهمٍ جواد
يفزع لمن ينصاه جاعلها شعار = في الطيب له فعلٍ ولاظني يعاد
معاك زان الهرج مني والحوار = الله يطعني بدالك في الفؤاد
( احمد ناصر المحرج )