ياصاحبي بيني وبينك مشاريه
وكل على المشروه لازم يقولي
ومن لايداري وقفتك لاتداريه
ولاعاد تخضع للردي والسفولي
امش بطريق واضحات مباديه
طريق ناموس العرب والاصولي
وكب اللئيم ويمته مع محاريه
ماهو بلك لازم ولاهو عدولي
ماغير يشعب سيته مع مهافيه
ويقول قول مايثبت بقولي
ترى الردي مايطاق ذكره وطاريه
المسرد اللي باللوازم جفولي
عليك بالطيب ماهو راعي التيه
ان حلت الشدات حزات هولي
راع المقام اللي بعاد مداليه
ماهو سوى لمخرزين النعولي
كل على ساسه ومجده وماضيه
والله فرق بين السبع والثعولي
ولا كل رجال تقول الوفا فيه
بعض الملا ماهو مقدم نزولي
جداه نقل الهرج والناس توحيه
اسود ضمير وخايب بالفعولي
باللازمة ينفاه حتى دوانيه
ولاياصل الحروة مواكر نذولي