لا تجرحن ماني بغاوي معايير = تكفي جروحي بين كاتب وقاري
ان كنت انا كويتي او كنت انا غير= شمر هلي وديار شمر دياري
شمر جبل كان انت باني لك قصير= مبناك يا مسكين ساسه هياري
شمر هل الصولات يوم الطوابير = والا انت ريشه مع هبوب الذواري
شمر عذاب معسكرات المسامير = لا طوحن سود العيون الهباري
شمر هل الردات شمرمغاوير = رديهم بالفعل فعل انتحاري
شمر اليا ثار الدخن والاعاصير = شمر هل السيف الحدب والشباري
فينا كرم حاتم وفينا طنا الزير = وعمر ابن معد الزبيدي مواري
تعال نازن فعلكم والمشاهير = يرجح بها من شمر(ن)فعل ضاري
عساك لجنون البقر والخنازير = وش عرضك لي وانت حافي وعاري
وش عاد لو تملك كثير الدنانير = واليا ركبت الروز والا الفراري
ثقافتك ما بين طبل ومزامير = ما طنتي حافظ صحيح البخاري
حنا بدو قبل اختلاف الجماهير = كانت مدينتنا فجوج الصحاري
نرحل وننزل بالسلف والمظاهير= ندرا ولا كنا لحي(ن)نداري
يا ما حلا المظهور لا نزل عصير= بين الخزامى والنفل والخباري
ثم عطفن جل البكار المقاتير = وبيت الشعر والسيل بالروض جاري
روض(ن)خضر به ديدحان ونواوير= وصوت ام سالم والقطا والقماري
ويا ما حلا المقناص لو ما معك طير = وشوف الجوازي والظبا والحباري
لا شفتهن نزلت من متنك السير = وفي مخزنه مخلوط عادي وناري
ومديتها وارعد صدى الصوت تفجير= بالقايده والملح ساقه جباري
ونجر(ن)ينادي لنشاما مسايير = والنار تدعي تالي الليل ساري
ما قاله دغيم ذكرته بتكرير = لا حل ذكر دغيم(ن)حي طاري
لا صكت البيبان دون الخطاطير= يكليب شبه في ظلام القداري
يمكن يشوفونه بعاد المشاوير = سارين ليل وصايمين النهاري
ويا ما حلا وقت الضحى لمة البير= بنات بدو(ن)يلبسن الخزاري
ذولي مواريد(ن)وذولي مصادير = وكل(ن)بزينه عالطبيعه تماري
ما دوجن بالسوق بين العطاطير = ولا صوتن راجو وميري ولاري
ولا دشن الصالون حمره وكوفير= ولا قلدن باللبس بدلة هلاري
مكياجهن نقش الكفوف ودواوير = وعطورهن ريح الفياض العصاري
هذه عوايدنا على الشر والخير = افهم وحدد من بعدها مساري
عن البداوه جبت شرح(ن)بتصوير= وعرضتها ما بين بايع وشاري
الشرح وافي ما يبي زود تفسير = ما قلت به خافي ذكرته جهاري
وللمستمع مني تحيه وتقدير = للحضر واللي ينزلون البراري
من غير نقص(ن)بالقبايل وتقصير= كل(ن)على حقه جزوع(ن)يثاري