منقول............................................. ........................... واعذرونا اذا حصل نقص او زيادة في موضوعي واعلما دائما ان الكمال له سبحانه................................اخوكم
بنيه" بعيد العلم يسـوى عدالـه
ياما صفقت يمناه من مال ورجال
الاشمل اللي ماضيـات فعالـه
زيزوم "غلبا" معدل الشيل لامال
هذا بنيه الجربا ابو عبطا يقولون سنة من السنيين صار بينه
وبين ربعه من شمر خلاف صغير وهو ينتزح عنهم
هو وكم بيت معه
وكما تعلمون بنيه اكثر مغازيه على الروله وعنزه وخاصة الفدعان من عنزه
الوكاد هو ياصل العلم لتركي بن مهيد "مصوت بالعشا" امير الفدعان
جاء يمه واحد قال ياتركي كانك تبي بنيه شفه نازلن بهكا المكان
قال ابن مهيد ترونا غزو
وهو يغزي هو وحوالي خمس طعش فارس معه ماهم واجد
يامار بنيه بأول سنيين زواجه
يامار متزوج له واحد بكلام الرواه انه من اجمل بنات العرب بزمانه
وهو يمر ابن مهيد على حلال بنيه يامار هذي مرة بنيه لابسه عباةٍ متقطعه
يامار اللبس وسط والزين واجد
" يامار ابن مهيد مايعرفه ولايدري منهي"
قال ابن مهيد :بالخير يابنت
قالت : يالله حيه
قال ابن مهيد: من انتي يابنت
قالت: مالك بالمعرفه شف بيتنا هذاك هو والله يحيك ضيف
قال ابن مهيد ماحنا ضيوف وكانك من عرب بنيه علميه حنا غزو
قالت :خلو الغزو عنكم وضيفوا بنيه
وهو يزعل ابن مهيد من رده عليه قال:
يابنت من علمك سرح الغنـم
والضان عرجا والمعز كشاّف
يابنت من لبسك جرد العبـا
يبلى بشلفى من يميني شـاف
يابنت عزباء ومالـك حليـل
ورمان صدرك للعقل خطاف
يابنت وان كنتي قصيره عندنا
لاالبسك ثوب الحرير الضاف
"يامار ابن مهيد مايدري انه زوجة بنيه"
قــــــالت "تبي تعلمه منهو زوجه"
انا حليلة مـن يجـر ردونـه
واليا هرج هرجه ماهو زياف
انا حليلة من يقصـر بعيطـه
يغض النضر عن جارته عفاف
انا حليلة من يحـط المنسـف
كفه صخيـه وخنصـره دلاف
انا حليلة مـن يعـز ربوعـه
ياصار بالجمعين كز شـلاف
هالساعه تشوفه وعينكم لـداره
من فوق حمراء شلفته تنشـاف
يخوي عليكم كالعقاب الكاسـر
انتم حباري وهو لكم خطـاف
وان ماجابـك اسيـر مكتـف
حارم عليه يقبل علي شفـاف
قال ابن مهيد علمي رجلك انا خذينا حلاله وهو ياخذ الحلال ويقفي به
وهي تركض يم بنيه يامار جالس يتقهوى
وهي بوجهه تسرج الفرس
قال بنيه عسى ماشر قالت غزو
قال كم هم قالت حول هالعشر
قال بنيه بسيطه
وهو يركب فرسه وهو يلحقهم يوم اقبل عليهم وهو يطلع له ابن مهيد
وهو يصير بينهم طراد عندك وعندك
وهم يتجادعون وهو يجدعه بنيه ويكز الرمح ياذابحن الفرس
وهو يلتفت بنيه للفريس الباقين قال ردو الحلال ولا ان الله اشى الا تشيلون بعضكم
الوكاد يوم ردو الحلال وهو يجيبهم بنيه لبيته ويذبح لهم
يوم تغدوا وخلصوا قال ابن مهيد نبي نمشي مار عطن فرسك يابنيه
قال بنيه اردف لحدى خوياك((اي اركب مع حدى خوياك رادفه على الفرس)) وياجيت ربعك علمهم بالعلم الوكاد