ياخاينه عهد الوفا والصداقه=قدر ضميرك بالخيانه يمشيك
كنت احلم اول مابديت العلاقه=انك تكوني راقيه في مباديك
ودفعك للغلطه طريق الحماقه =اللي متاهاته عن النور تعميك
يابنت ماهو حق تال الرفاقه = تشوهين الي ضميره مصافيك
اعطيتك الوقت الثمين بلباقه = واليا طلبتي دون غيرك ابديك
اعطيك قدح الراس واعذب مذاقه=واليا دعيتي جيت عجله البيك
مثل السحاب الي لك الرب ساقه =ينهي ضما قلبك ويسقي مفاليك
جيتك عظامك يابسات(ن) دقاقه =واعطيتك الصافي وعاش الحيا فيك
واليوم يوم انك حفظتي وثاقه=قمتي تحطين الحبل لي مشابيك
يابنت جيتي من سرقها سراقة = الي يعدون الخطا في مواطيك
شعاع شمسن لايغرك عناقه = يسرق نظر عينك ويخلف مساعيك
يفتيك فالمردود قطاع ساقة= سرون قفا قافه على القاف قافيك
حروف خطك كلبوها رقاقة=وحروف خطه فالقصايد صعاليك
الله يستر يابيوت العراقه=ياصار وكر الحر خلّف لكم ديك
الرمز بان وواجبه في غلاقه=وحسب المعاني رمز الابيات يكفيك
يابنت مالي فيك حيله وطاقه= همك توطني وانا شمت ماابيك
انا الذي يصعب عليك التحاقه = بالشر تمسيني وبالخير امسيك
يابنت طيبي ما اخذته شفاقة=قد قالها شيخن حكم له مماليك