أهرب من أتعاب الزمن في متاهات=ودمعةْ قهر في داخلي تصطليبي
أصبر على مر الألم والعذابات=يمكن مع الأيام بلقى طبيبي
وأكتم همومي داخل القلب لاجات=أضحك وأسولف والغبن يحتميبي
لازارني وقت الفرح والمسرّات=أقضب يمينه وأبتهج مادريبي
يمكن ملامح وجنتي بعض دمعات=يمكن على باله أقول اشتبيبي
يمكن ويمكن ياكثر يمكن تبات=في داخل قبور الأمل تنتخيبي
ملّيت تزييف الهنا والملذّات=في قلب لاميت ولكن صويبي
مره أحس إن القهر كاوي الذّات=ومرّات أحسه جاهل ٍ لي غريبي
لا الضحك وقته يمتلي بالمساحات=لاضاق صدرك بالجراح العطيبي
صدر الأمل لامن تضارب بالأصوات=ثم اعتلى دقّ الخفوق العجيبي
في هجعةْ عيون البشر والمنامات=اعلم بأن الرب يمّك قريبي
اطلب وناظر في خضوع ومذّلات=وارفع كفوفك دعوتك تستجيبي
رغم الألم والضيم رغم المُعانات=رغم الملل والهم قلبي طليبي
والله مادام الرب عوني فلا مات=نبض التفاؤل في عروقي صبيبي