يقول الراوي :
هذي حكايه طريفه جرت بيـن الـعـقـيـد المشهور بذاك الوقت
دبي الشمري ويقال بانه من التومان , الحمولة الكريمه المعروفه بالمغازي .
وبين صالحه وهي من المحينات من قبيله عنزة الكريمه .
كانت صالحه ترعى لأهلها والظاهر انها يتيمه , لأن البنات
مايسرحن الا نادرا ً , اما ماعندها اخوان وابوها شايب او يتيمه .
أهل صالحه عـيـوا لايعـطـونـهـا .. الهجار ..(الهجار تربط بـه يد الجمل برجله حتى مايتحرك بسهوله)
وهذي صالحه أهلها معيين لايعطونها هجر للزمل( الزمل: الجمال فقط).
وعذبنها وأتعبنها ...وهذا شي مايتحمله الرجال كيف بنت ناعمة
ومافي امل تتخلص من هالعذاب الا ان يجي غزو وياخذهن!
وماجاهم غزو .....!!
وماكان قدامها حل الا انها تنخى أحد العقداء المشهورين بهاك الأيام
حتى يجي وياخذهن ويفكها من العذاب .. بعد ماطفح الكيل ...!!
ووقع اختيارها على فارسنا دبي
تقول صالحه :
ماتويـق ياشيـن يادبـي
على المحينات لك نوبه
الـزمـل هـيـاج عـذبــي
والهجر بالبيت عيوبـه
المهم .. وصلت القصيده لدبي ..!
تحركت فيه النخوه وماهانت عليه صالحه!
وفعلا ً غزى على المحينات .. ولقى صالحه ..!
قال دبي : من انتي ..؟!
قالت(وهي شافت الوسم) : الله جابك .. انـا صالحه يادبي!؟
قال : جيتك وانا اخو فلانه..!!
قالت : كفو والله
قال : عقلي بعيرك اللي تركبين , وانا اريحك من البـاقي..!
وفعلا ً اخذهن وفـكها منهن , وراحت لأهلها
يقول دبي بصالحه بعد ماهب لمساعدتـها وانقاذها.. :
يــاصــالــحـــه يــــــــــام دواره
عـيــن الـغـزيــل لــيــا ســجــي
مـانـتـي مـــن الـبـيـض مـكــاره
اصدق من اللي نهج حجي!!!!!!!
يـابـطـن حـمــرا مــــع الــغــاره
حــوايـــة الــبـــوش لاهـــجـــي
،
،
،