شيٍ جديد يناسب لموقـف جديـع
يقول منهو طوّع القاف تطويع=مبدآه ذكر الله وفيه متأمّل
ياهاجسي خلك على الكيف ومطيع=واحرص على شيٍ جديدٍ يجمّل
شيٍ جديد يناسب لموقف جديع=اللي على روس المعالي مصمّل
رجلٍ يسوم الطيب ولا يطري البيع=طِيبٍ جديدٍ فوق طيبٍ مسمّل
ميراث أب و جد أهل المفازيع=وهذا أبو مذود للمسيرة يكمّل
نادر ومن ماكر حرارٍ بواتيع=مثل الأصايل في سباق التحمّل
وافي وكافي يابعيد المراميع=زودٍ على فعلك ترى اسمك يجمّل
والله مالي من ورآها مطا ميع=ولا أنا من اللي للعطايا يأمـّـل
وماقلتها ياكود طنخة وتشجيع=واحس راسي بالطناخه ينمّــل
واختم بحمــــد للـي له المسلم يطيع=اللــــي لخلـــقه حــــافـــظٍ مــايهمّــــــــل
سطم فهد الخليل
.