في احدى السنين اغاروا الروقة من عتيبة على التومان من شمر
وكانوا عقدا القوم من الروقة هم
حباب بن زريبه امير الجذعان
واخوة غازي بن زريبه وهم من اشهر فرسان عتيبه ولهم اماره وشيخة فخذ الجذعان من الروقة
وكان معهم احد ابناء مسلط بن ربيعان وهو من اكبر شيوخ عتيبه
وكذلك احد ابناء الضيط وهو امير العضيان ومن اشهر فرسانهم على الاطلاق
فحددوا ابل التومان واغاروا عليها واخذوها فبلغ الرعيان العرب
وفزعوا التومان وكان من ضمن الفزاعة الشيخ والفارس المشهور مثقال الربع
صار الطراد بين مثقال وحباب وشمر يجيدون طراد الخيل اكثر من غيرهم
وعرف غازي ابن زريبه ان مثقال سيطر على مجريات الطراد
وخاف على اخوه حباب فانطلق على مثقال من الخلف ورماه بالشلفا
ويوم طاح مثقال انكسرت شمر
عرضو فريس التومان من جديد وقاموا يحدون على الخيل ويقولون
حباب جاء وقت الفنا..................... من سربة تتلى الامير
الفين تطعن بالقنا.......................... والفين ترمي بالذخير
ويردون قال واحد منهم هذولا شمر هل الردات وهذي عاداتهم
وهم لك يميلون عليهم واول من طاح بنحورهم غازي بن زريبه ذباح مثقال
وهم يردعونه بخوة الشيخ حباب واللي ذبحة من التمياط
وهي لك تصير على الروقة
وخبرك اكا الوقت المنع من عادات البدو في حروبهم لكن شمر رفعوا المنع بعد ذبحة
مثقال لانه فارس وعزيز عليهم
وصارت الدعوى ثار وفرسان شمر ما منعوا احد وصارت ذبحة على الروقة
ابن ربيعان والضيط دريوا انه ما فيه احد يمنعهم
وزبنوا على بيت التمياط ودخلوا بوجهه وزبنهم البيت
ويوم جوا شمر بيذبحونهم قال التمياط ياشمر هذولا بوجهي ودخلا على بيتي
قالوا يالتمياط رجالنا مذبوح والمنع مرفوع
قال انا داخل على الله ثم عليكم هذولا دخلا بيتي وفي وجهه ولا تذبحون وجيهنا مع ذبحة رجالنا
والتمياط عزم على حمايتهم يوم درى انهم من روس القوم
وتنازلوا التومان عنهم كرامة لوجه اميرهم وبيته وقطع للفتنه.
مسلط ابن ربيعان من اشهر فرسان الجزيرة العربية كان شيخ كبير وكان يتحرى علوم الغزو
وجته علوم انهم كسروا وقتل منهم ناس وطاح ناس
وجاه واحد يبشره وقال ابشر ياطويل العمر
وان ولدك وولد الضيط سالمين فكهم التمياط وزبنهم
قال اللي يبي البشاره يبشرني بحباب ابن زريبه
قالوا له حباب ذبح هو واخوة وهو اول من طاح بنحور شمر
ويقولون انه بكى عليه لان حباب كان شيخ وفارس مشهور
اذا كان هناك ملاحظات أمل تعديلها
دمتو بخير